Presidenti serb Aleksandar Vuçiç tha më 17 tetor në Beograd se “Për sa kohë që ne mund të rezistojmë, pa rrezikuar interesat tona më vitale dhe shtetërore, ne do të ndjekim politikën e vendosur në konsultim me Këshillin e Sigurisë Kombëtare” në lidhje me sanksionet kundër Rusisë, shkruan The Geopost, përcjell Fol Drejt.
“Kur nuk mundemi, do t’i drejtohemi popullit tonë, qytetarëve tanë dhe do t’u themi pse Serbia nuk mund t’i rezistojë vendosjes së sanksioneve, tha Vuçiç gjatë një ceremonie për shënimin e 20 vjetorit të themelimit të Agjencisë së Sigurisë dhe Informacionit (BIA).
“Unë nuk mendoj se mund të keni një mesazh më të qartë dhe më konkret”, tha Vuçiç.
“Dhe kur thashë se vetëm të shtyrë dhe të kërcënuar ne mund ta ndryshojmë vendimin dhe politikën tonë në përputhje me pritshmëritë e disa njerëzve, po ju them se kjo nuk do të zgjaste më shumë se pesë ditë, pastaj do të na rrihnn supet dy herë, do të lëshonin dy njoftime dhe më pas do të fillonin presionin e ri dhe një histori të re lidhur me Kosovën”, tha Vuçiç.
Serbia është tërhequr mbrapa në drejtim të përafrimit të politikës së jashtme me Bashkimin Evropian, thuhet në raportin e përparimit të Komisionit Evropian të lëshuar në 12 tetor.
Në raport thuhet gjithashtu se në vitin 2021 Serbia i ka përshtatur pozicionet e saj me ato të BE-së me 64 për qind, ndërsa në gusht të këtij viti kjo përqindje ka rënë në 45 për qind, për shkak të refuzimit të Serbisë për të vendosur sanksione ndaj Rusisë.
Rusia është subjekt i sanksioneve perëndimore për shkak të agresionit të saj kundër Ukrainës.
Serbia është i vetmi vend në Ballkanin Perëndimor që nuk i është bashkuar BE-së në vendosjen e sanksioneve ndaj Moskës. /FolDrejt/
