Figura e Aleksandër Vuçiqit është vënë në pikëpyetje. Në një kohë krize kur Serbia ndodhet nën presionin ndërkombëtar për ta jetësuar marrëveshjen e arritur me Kosovën, për t’i shkëputur lidhjet me Rusinë dhe për ta demokratizuar vendin, autoriteti i tij po vihet gjithnjë e në pikëpyetje edhe nga një presion i brendshëm qytetar, shkruan Fol Drejt.
Masiviteti i protestës “Serbia kundër dhunës”, e ka shtyrë atë drejt një obsesioni për të mbledhur sa më shumë njerëz në tubimin e thirrur nga Partia Progresive Serbe e udhëhequr prej tij, më 26 maj.
“Rezultati: njerëz të frikësuar, të shantazhuar… Janë po aq sa para protestave në Beograd. Do t’i shtyjë organizatorët drejt natyrës represive duke i futur me forcë në autobusë “përkrahësit” dhe duke i shtuar masat e shtuara për t’i mbajtur me forcë ata që duan të largohen nga kampi gjatë mitingut, siç e kemi parë tashmë në Pançevë” – ka komentuar për Danasin, Janko Baljak.
Obsesioni i Vuçiqit që mitingu i tij t’ia kalojë atij të Gazimestanit të Millosheviçit, tregon që aparatura e tij ka rrëshqitur drejt një sistemi diktatorial.
Komentet për metodat e grumbullimit të njerëzve në sheshet e Beogradit, përkundër dëshirës së tyre, janë tërësisht negative. Një burim i grumbullimit të njerëzve, nëpërmjet autobusëve të organizuar, është edhe Kosova. Mediat serbe kanë raportuar edhe më herët se si SNS, ka shfrytëzuar mekanizmat për grumbullimin e “ithtarëve” të Vuçiqit, nëpërmjet këtyre metodave.
Duket se protesta “Serbia kundër dhunës”, e ka shtyrë atë ta shtoj represionin, ndaj besnikëve të tij. Shkurt, sipas një pjese të opinionit serb, autoriteti i Vuçiqit është vënë në krizë tashmë edhe brenda kampit të tij./FolDrejt/
