Përsëritja e zgjedhjeve lokale në katër komunat veriore, në Mitrovicë Veriore, Zveçan, Zubin Potok dhe Leposaviç, para disa muajsh shihej si një mundësi për të dalë nga kriza dhe tensionet e vazhdueshme që i karakterizon raportet aktuale ndërmjet Kosovës dhe Serbisë. Megjithatë, pas sulmit terrorist në Banjskë, procesi i dialogut është ngrirë, me Prishtinën zyrtare e cila e akuzon Beogradin zyrtar si planifikues të sulmit, shkruan Fol Drejt.
Megjithatë, duket sikur presidenti i Serbisë Aleksandër Vuçiq ka filluar ta shoh si opsion çështjen e daljes në zgjedhje të parakohshme në komunat veriore.
Mediat në Beogradi citojnë Vuçiqin të ketë thënë se ai do t’i përkrahte serbët, po qe se do të vendosnin të shkonin në zgjedhje:
“Unë kurrë nuk e detyroj askënd, as nuk mund ta bëj këtë, as nuk jam pronar i jetës dhe i së ardhmes së tyre. Thashë se mendoj se rrethanat kanë ndryshuar, se do të ishte mirë të mendonin dhe këtë po ua kërkuan.”
Ndërsa po qëndron në Pekin në një vizitë zyrtare, Vuçiq ka vënë theksin sërish te formimi i Asociacionit të komunave me shumicë serbe dhe ka thënë se do të ishte mirë që palët t’i rikthehen dialogut.
“Edhe biseda më e keqe është më mirë se pa bisedë,” u tha Vuçiç gazetarëve në Pekin.
Ua kujtojmë se në zgjedhjet e fundit Lista Serbe dhe politikanë të afërm me Vuçiqin, u bënë thirrje serbëve të Kosovës që ata t’i bojkotonin ato, e më pas edhe të mos e njihnin rezultatin e tyre. Pasuan protestat e dhunshme të cilat kulmuan me sulmin terrorist mbi Policinë e Kosovës në Banjskë, më 24 shtator./FolDrejt/
