Presidenti serb Aleksandër Vuçiq tha se nuk është i sigurt dhe se nuk mund të premtojë më se nuk do të vendosë sanksione kundër Rusisë në të ardhmen, shkruan Klix, përcjell Fol Drejt.
“Nuk mund të betohem se nuk do ta bëjmë dhe nuk mund të premtoj sepse do të ishte e papërgjegjshme, por qëndrimi ynë është aq i fortë sa nuk është dashur ta bëjmë deri më tani”, tha Vuçiq.
Presidenti i Serbisë theksoi se vendi i tij shumë shpejt e përcaktoi qëndrimin e tij për luftën në Ukrainë përmes Këshillit të Sigurimit.
“Ne nuk vendosim sanksione ndaj Federatës Ruse, dhe konkluzionin e kam shkruar në Këshillin e Sigurimit të Serbisë, jemi konsultuar (me njëri-tjetrin) për çdo fjalë, por unë i kam shkruar. Ne kemi ndjekur çdo fjalë dhe kemi përcaktuar politikën e Serbisë, për të cilën ne ndonjëherë paguajmë çmimin”, shtoi ai.
Duke iu drejtuar kombit menjëherë pas nisjes së operacionit ushtarak rus në Ukrainë, Vuçiç njoftoi se Serbia nuk do të vendosë sanksione ndaj Rusisë, megjithëse mbështet integritetin territorial të Ukrainës.
Në atë kohë, ai njoftoi gjithashtu se vendi i tij do të pezullonte përkohësisht të gjitha stërvitjet ushtarake dhe policore me partnerët e huaj. Ai theksoi se Serbia i sheh Rusinë dhe Ukrainën si kombe vëllazërore, i vjen keq për ngjarjet në Evropën Lindore dhe është e gatshme të ofrojë ndihmë humanitare për Kievin.
Kujtojmë se pas paraqitjes së akuzave se Serbia po i shet armë Ukrainës, të cilat u komentuan edhe nga zëdhënësja e ministres së Jashtme ruse Marija Zaharova, Vuçiq i ka mohuar këto informacione.
Zaharova tha se kjo është një çështje shumë serioze, ndër të tjera, nga pikëpamja e marrëdhënieve ruso-serbe, për të reaguar siç duhet tani dhe se duhet të mbështetemi në fakte.
Vuçiq i ka mohuar këto informacione dhe ka thënë se kjo është një gënjeshtër.
“Serbia nuk i ka dërguar armë askujt. Serbia prodhon dhe shet municion. Ne kemi shumë kompani në industrinë e mbrojtjes. Kur prodhoni municion, ai me siguri do të përfundojë në një zonë konflikti ose në një rajon krize. Ne nuk kemi shitur asnjë armë ose municione për Rusinë ose Ukrainën”, tha Vuçiq.
Vuçiq përkujtoi se produktet e industrisë së mbrojtjes serbe u dërgohen vetëm përdoruesve të autorizuar, përkatësisht vendeve pa kufizime ndërkombëtare. /FolDrejt/
