“Serbia është e gatshme të punojë në zbatimin e shumë gjërave nga plani evropian për Kosovën, por ne kemi shprehur një kundërshtim të qartë dhe të madh – se nuk ka bisedime për njohje reciproke, apo për anëtarësim të Kosovës në OKB”, është deklaruar së fundmi Presidenti i Serbisë Aleksandër Vuçiq, shkruan Fol Drejt.
Presidenti i Serbisë Aleksandër Vuçiq ka dhenë një intervistë dje për televizionin nacional serb RTS, ku ndër të tjera ka thënë se për sa të jetë ai në pushtet, kurrë nuk do ta njoh Kosovën:
“Këtë ua thashë presidentit Macron dhe kancelarit Scholz në Mynih, dhe të gjithë liderëve të mëdhenj, madje edhe Lajçaku dhe Borrelli e dinë. Këtë e përsërita pikërisht dje. Bëhet fjalë për faktin se unë nuk dua dhe nuk mund të diskutoj për njohje reciproke, njohje dhe hyrje të Kosovës në OKB.”
Ai ka thënë gjithashtu se është i hapur për të diskutuar gjithçka tjetër.
“Jo sepse na çon më tej në rrugën tonë evropiane, që është e rëndësishme, por sepse është e mirë për marrëdhëniet ndërmjet serbëve dhe shqiptarëve. Janë të panumërta pikat që janë të rëndësishme”, është shprehur ai, duke iu referuar propozimit evropian për një marrëveshje për rrugën drejt normalizimit të marrëdhënieve ndërmjet Serbisë dhe Kosovës.
Vuçiq tha se në takimin e djeshëm në Bruksel nuk është rënë dakord për udhërrëfyesin, por se qëndrimi i Serbisë është që njohja dhe anëtarësimi i Kosovës në OKB nuk mund të përfshihet në planin e zbatimit dhe se bisedimet për këtë çështje mund të ndodhin më pas.
“Ne do të punojmë në planin e zbatimit se si të organizohet përfaqësimi rajonal, një temë shumë e rëndësishme, si të bëhen vulat doganore sipas marrëveshjes së vitit 2011 të Borko Stefanoviqit, do të punojmë se si të rregullojmë lirinë dhe qarkullimin e mallrave, kapitalit dhe shërbimeve, do të punojmë se cilat janë të drejtat e ekstraterritorialitetit për mbrojtje të veçantë për kishën serbe”, citohet të ketë thënë Vuçiq.
Ai ka shpjeguar se propozimi evropian de facto është bërë kornizë për një proces negociator të panegociueshëm, por ka theksuar se përderisa është në pozitën e presidentit nuk do të nënshkruajë, as nuk do të pranojë as njohje formale e as informale të Kosovës. Hyrja e Kosovës në OKB.
Vuçiq vuri theksin te Asociacioni i Komunave me Shumicë Serbe, si pikë e patejkalueshme, e cila pas implementimit, mund të iu hap rrugë diskutimeve të tjera. Megjithatë, sipas tij, Kosova vështirë se do ta formojë atë në një të ardhme të afërt.
I pyetur nëse dikush në takimet në Bruksel i ka thënë kryeministrit të Kosovës Albin Kurti se duhet ta formojë Asociacionin, Vuçiq ka thënë se:
“Të gjithë ia thonë, dhe ai u përgjigj se i ka premtuar popullit se nuk do ta përmbushë, andaj jemi në një sërish ngërç”.
Takimi i fundit në Bruksel ndërmjet Kryeministrit Albin Kurti dhe Presidentit të Serbisë Aleksandër Vuçiq, përfundoi me një marrëveshje për vazhdimin e planit të zbatimit, i cili derivon nga propozimi Franko-Gjerman./FolDrejt/
