Eurodeputeti holandez Thijs Reuten nga grupi socialdemokrat i kërkoi Komisionit Evropian të shpjegojë “politikën e tij të pakuptueshme” ndaj Serbisë dhe deklaroi se (presidenti serb Aleksandër) Vuçiq po përdor BE-në si bankomat, shkruan Danas, përcjell Fol Drejt.
Reuten i kërkon Komisionit të përgjigjet se çfarë do të bëjë për të inkurajuar Serbinë që të nënshkruajë propozimin e BE-së dhe nëse do të pezullojë pagesat ndaj Serbisë sipas Planit Ekonomik dhe Investiv derisa presidenti i saj të nënshkruajë dhe të demonstrojë një angazhim të besueshëm për zbatimin e propozimit të BE-së.
Vuçiq përdor BE-në si bankomat të tij dhe më pas kthehet dhe refuzon të nënshkruajë marrëveshjen e ndërmjetësuar nga BE-ja me Kosovën”, ka shkruar Reuten në Twitter, ku ka publikuar edhe tekstin e pyetjes së tij drejtuar Komisionit Evropian, të cilit i kërkon përgjigje me shkrim.
Reuten thekson se më 28 shkurt, Komisioneri Evropian për Fqinjësi dhe Zgjerim, Oliver Varheji, i ka prezantuar Serbisë një paketë mbështetjeje financiare prej 2.2 miliardë euro, nga të cilat 600 milionë janë grante. Siç shtoi ai, ky është granti më i madh i BE-së për Serbinë deri më tani.
Në konferencën për shtyp me atë rast, komisioneri evropian e quajti Serbinë, e cila po bëhet gjithnjë e më autoritare; “mik” dhe tha se vetë dita (e prezantimit të paketës) është “e veçantë” dhe “shumë simbolike”.
“Po atë mbrëmje, presidenti i Serbisë tha në televizionin kombëtar se nuk dëshiron të nënshkruajë marrëveshjen e ndërmjetësuar nga BE-ja për rrugën e normalizimit të marëdhënieve ndërmjet Kosovës dhe Serbisë, për të cilën gjoja ishte rënë dakord një ditë më parë dhe për të cilën kryeministri i Kosovës ishte gati për të nënshkruar”, thekson më tej Reuten në letrën e tij drejtuar Komisionit.
Reuten pyet Komisionin nëse, në dritën e refuzimit të presidentit serb për të nënshkruar propozimin e BE-së, ai ndan mendimin se vizita e komisionerit në Serbi, lavdërimi i tij dhe dhënia e grantit më të madh për Serbinë deri më sot mund të tregojnë se BE-ja mbështet obstruksionizmin e Serbisë.
Eurodeputeti holandez, ndër të tjera, është anëtar i Komisionit për Politikë të Jashtme të Parlamentit Evropian (AFET) dhe zëvendës anëtar i delegacionit të BE-së në Komitetin Parlamentar për Stabilizim dhe Asociim BE-Serbi. /FolDrejt/
