Presidenti i Serbisë Aleksandër Vuçiq tha në një konferencë për media se po zhvillohet një hetim kundër deputetes britanike Alicia Kearns, e cila gjatë fjalimit të saj në parlament akuzoi Kishën Ortodokse Serbe për pjesëmarrje në kontrabandën e armëve nga Serbia në Kosovë, transmeton Fol Drejt.
“Alicia Kearns, kryetare e komitetit të politikës së jashtme të Britanisë së Madhe, e njohur ndryshe për aktivitetet e saj antiserbe, është dëshmuar si një lobiste sepse thotë gënjeshtrat më të këqija për popullin serb” – citohet të ketë thënë Vuçiq.
Sipas tij, krahas “sulmeve policore”, tashmë po futen edhe elemente të reja të cilat atakojnë kishën dhe sistemin shëndetësor, dy shtyllat e Serbisë në Kosovë.
Sipas Vuçiqit në autoambulanca nuk kanë gjetur armë, por barna.
“Aktorët ndërkombëtarë duhet të ndalojnë së sulmuari zyrtarët e zgjedhur në mënyrë demokratike që të vendosen në zyrat e tyre në veri të Kosovës. Për më tepër kur ata qëndrojnë të heshtur përballë militantëve e mbështetur dhe të armatosur serb, të cilët vazhdojnë të minojnë stabilitetin në veri të Kosovës”, ka thënë ndër të tjera Kearns.
Deklaratave të saj i janë kundërpërgjigjur Dioqeza e Prizrenit, e cila kërkoi që urgjentisht të hetohet kjo akuzë, si dhe KFOR-i, i cili deklaroi se nuk ka dëshmi të kontrabandimit të armëve nëpër kisha.
Po ashtu, sipas mediave serbe, Ministri i Punëve të Jashtme të Serbisë, Ivica Daçiq, i ka hedhur poshtë këto akuza në një bisedë me të Ngarkuarën me Punë të Ambasadës së Britanisë së Madhe, Dominika Otveja. Për shkak të seriozitetit të pretendimeve, ai nënvizoi se Ministria e Punëve të Jashtme vepron me seriozitet dhe përgjegjësi të plotë dhe pret më shumë informacione dhe verifikim urgjent të pretendimeve të përmendura, si nga pala britanike ashtu edhe nga autoritetet tjera kompetente, përfshirë misionin e KFOR-it sipas deklaratës./FolDrejt/
