Media opozitare Nova.rs ka shkruar mbi orvatjet e Presidentit Serb Aleksandër Vuçiq, për ta bindur opinionin publik që meqë nuk ka nënshkruar asnjë dokument në lidhje me marrëveshjet e fundit ndërmjet Kosovës dhe Serbisë, nuk i detyrohet asgjë askujt, transmeton Fol Drejt.
“Nuk kanë kaluar as 24 orë nga takimi në Ohër dhe presidenti serb Aleksandar Vuçiq u përpoq ta bindë opinionin se Aneks-marrëveshja me Prishtinën nuk është detyruese, sepse ai nuk e ka nënshkruar atë. Me të njëjtën shpejtësi kanë mbërritur edhe mohimet e Bashkimit Evropian dhe Amerikës, zyrtarët e të cilëve thonë – ajo është shumë e vlefshme, shkruan Fol Drejt.”
Por Vuçiqi është demantuar menjëherë nga Përfaqësuesi i Bashkimit Evropian për Politikë të Jashtme Josep Borrel dhe Gabriel Escobar, i deleguar special i Shteteve të Bashkuara të Amerikës (ShBA), për çështjet e Ballkanit Perëndimor.
“Marrëveshja nuk u nënshkrua për arsye ligjore, por të dyja palët ranë dakord që deklarata ime (pas takimit të Ohrit) përfaqëson angazhimin e të dyja palëve për t’u përkushtuar plotësisht ndaj detyrimeve që dalin nga kjo marrëveshje dhe zbatimi i saj”, ka thënë Borrel.
Borrel tha se kjo është një pikë kthese e rëndësishme në procesin e normalizimit të marrëdhënieve, që krijon një “status quo të re në dialog”. Ai theksoi se BE-ja do ta përcjellë procesin e zbatimit të gjithçkaje që është rënë dakord dhe ka shtuar se ka gjëra urgjente që duhet të zbatohen menjëherë, siç është formimi i Bashkësisë së komunave me shumicë serbe në Kosovë.
I njëjti mesazh erdhi nga i dërguari special i SHBA-së për Ballkanin Perëndimor.
“Marrëveshja e arritur nga Kosova dhe Serbia në takimin në Ohër, në Maqedoninë e Veriut, është ligjërisht e detyrueshme. Ai është ligjërisht i detyrueshëm për të dyja palët në çdo kuptim. Nuk ishte çështje nënshkrimi, por përkushtimi”, tha me këtë rast Gabrijel Eskobar.
“Hapi i radhës për të dyja palët është fillimi i zbatimit të marrëveshjes”, theksoi ai.
Kështu i janë dhënë fund të gjitha spekulimeve nëse është e vlefshme apo jo marrëveshja nga Brukseli dhe Ohri, të cilën e ka iniciuar presidenti serb.
Kujtojmë, një ditë pas takimit në Ohër, në një fjalim për opinionin publik në Serbi, Vuçiq tha se në kuptimin formal dhe juridik është e vështirë të vërtetohet se ekziston një marrëveshje pa nënshkrim.
Një ditë pas deklaratave të Borrelit dhe Eskobarit të cilat e përgënjeshtruan presidentin serb, ai tha se qëndrimi i tij nuk ka ndryshuar për asnjë pikë, as para askujt. Por duket se në praktikë, megjithatë ka ndryshuar, meqë ka thënë se marrëveshja verbale vlen.
“Do ta përsëris edhe një herë – është ligjërisht e detyrueshme për Serbinë kur unë i vë nënshkrim ose vulë diçkaje ose kur bie dakord verbalisht ose gojarisht me të. Askush nuk mund të prodhojë pasoja ligjore për Serbinë, përveç presidentit të saj ose, në disa raste, kryeministrit apo ministrit të punëve të jashtme. Sa i përket zbatimit, Serbia do të përmbushë dhe do të bëjë gjithçka që ka thënë se do të bëjë për zbatimin”, citohet të ketë thënë Vuçiqi.
Ua kujtojmë se edhe në takimin e Ohrit, Vuçiq nuk qe i gatshëm ta nënshkruante dokumentin e aneks marrëveshjes, përkundër palës kosovare, përkatësisht Kryeministrit Albin Kurti, i cili tregoi gatishmëri për realizimin e këtij akti./FolDrejt/
