Presidenti i Serbisë, Aleksander Vuçiq, ka paralajmëruar një vizitë të pesë emisarëve në Beograd më 21 tetor. Ai ka thënë se pritet të shihet se çfarë “pako” do të sjellin pesë emisarët, të cilët është paralajmëruar se do të zbarkojnë në Serbi në fund të muajit.
Këtë Vuçiq e ka treguar kur është pyetur se a pret presion shtesë ndaj Serbisë pas sulmit të 24 shtatorit në Banjskë të Zveçanit ku mbeti i vrarë polici i Kosovës, tashmë heroi Afrim Bunjaku.
“Është jeta jote, puna jote. Ti përballesh me presion të jashtëm, me ata që dëshirojnë ta shkatërrojnë Serbinë në mënyrë të ndryshme. Unë nuk besoj që ky është rasti me “pesëshën”. Unë besoj se ata dëshirojnë të ngrejnë probleme për zgjidhjen e krizës në Kosovë në një mënyrë ndryshe. Unë shpresoj ta shohim atë lloj pakoje dhe çfarë do të sjellin më 21 tetor”, ka thënë Vuçiq.
