Presidenti serb Aleksandër Vuçiq tha sot në Novi Sad se serbët në veri të Kosovës nuk do t’i pranojnë kurrë “kryetarët e rremë” të zgjedhur në zgjedhjet e fundit të bojkotuara nga populli serb, raporton Klix, përcjell Fol Drejt.
Vuçiq tha se pjesëmarrësit e “zgjedhjeve asnjëherë më të mjera”, me dalje prej tre për qind, do të tentojnë të mbajnë seanca konstituive për tri komuna për të zgjedhur kryetarët e komunave nesër në ndërtesën e administratës në Mitrovicë.
“Unë po kërkoj nga serbët që të ruajnë paqen dhe këta nuk do të pranohen kurrë për kryetarë komunash. Kjo është një përpjekje për të krijuar një atmosferë që serbët të largohen nga vatrat e tyre dhe asgjë më shumë”, tha Vuçiq.
Ai shtoi se dje ka biseduar për situatën në Kosovë me përfaqësuesit amerikan Derek Chollet dhe Gabriel Escobar, si dhe me ambasadorin amerikan në Beograd, Christopher Hill.
Kujtojmë se Vuçiq së fundi ka theksuar se serbët nuk është dashur të marrin pjesë në asnjë zgjedhje në Kosovë të organizuar nga Prishtina, derisa të formohet Unioni i Komunave Serbe.
Ai më pas tha se është befasuar nga deklarata e zëdhënësit të BE-së, Peter Stano, i cili tha se është i zhgënjyer pasi serbët nuk do të votojnë.
Vuçiq tha se nuk është faji vetëm i Prishtinës, por edhe i BE-së, sepse ata ishin garantues i zbatimit të Marrëveshjes së Brukselit, të cilën e ka nënshkruar ish-përfaqësuesja e lartë për politikë të jashtme dhe siguri, Catherine Ashton. /FolDrejt/
