Presidenti serb, Aleksandër Vuçiq, ka thënë se serbët nuk është dashur të marrin pjesë në asnjë palë zgjedhje në Kosovë derisa të formohet Asociacioni, raporton Klix, përcjell Fol Drejt.
Ai tha se zgjedhjet e nesërme në Kosovë do të mbahen në kontejnerë me më shumë se 500 persona “të armatosur deri në dhëmbë”, por se serbët do të tregojnë se sa të bashkuar janë.
Vuçiq tha se serbët nuk është dashur të marrin pjesë në asnjë zgjedhje në Kosovë të organizuar nga Prishtina, derisa të formohet Asociacioni i Komunave Serbe (ZSO).
Ai ka theksuar se është befasuar nga deklarata e zëdhënësit të BE-së, Peter Stano, i cili ka thënë se është i zhgënjyer sepse serbët nuk do të votojnë.
Vuçiq tha se nuk është faji vetëm i Prishtinës, por edhe i BE-së, sepse ata ishin garantues i zbatimit të Marrëveshjes së Brukselit, të cilën e ka nënshkruar ish-përfaqësuesja e lartë për politikë të jashtme dhe siguri, Catherine Ashton.
“Deri më tani kemi marrë pjesë në katër-pesë cikle të ndryshme zgjedhore të organizuara nga Prishtina dhe nuk është dashur të marrim pjesë në asnjë prej tyre derisa të formohet Asociacioni, apo në një pas të cilit do të ishte e qartë se cilat janë komunat serbe dhe se pastaj do të vazhdonim në Asociacion”, u tha Vuçiq gazetarëve në Batajnicë.
Duke iu përgjigjur pyetjes së një gazetari se çfarë do të ndodhë me serbët nga Kosova që nuk kanë pasaportë të Kosovës dhe nuk mund të udhëtojnë, presidenti i Serbisë tha se kjo çështje është duke u diskutuar dhe se beson se problemi do të zgjidhet deri më 1 janar të vitit të ardhshëm. /FolDrejt/