Aleksandër Vuçiq ka mbajtur një konferencë për media, pas takimit me përfaqësuesit e Listës Serbe, me ç’rast iu ka folur për takimin e Brukselit dhe procesin e bisedimeve me Kosovën.
Siç është raportuar më herët, në këtë takim me presidentin serb morën pjesë përfaqësues të Listës Serbe, krerë të komunave me shumicë serbë në Kosovës si dhe drejtorë të spitaleve.
Ai ka thënë se në takimin e fundit në Bruksel me Kryeministrin e Kosovës Albin Kurti, gjithçka ka shkuar keq, meqë sipas tij, pala kosovare i ka refuzuar të gjitha propozimet e Beogradit.
Delegacioni kosovar, sipas tij, i ka hedhur në tavolinë këto gjashtë pika, si propozim për arritje të marrëveshjes:
1. Njohja e ndërsjellë dhe anëtarësimi në të gjitha organizatat ndërkombëtare.
2. Zgjidhja e problemit të zhdukurve, konstatimi dhe zgjidhja e problemit të personave të përdhunuar, të zhvendosurve, shkatërrimi i pronës private dhe asaj publike, rikthimi i artefakteve dhe veprave tjera artistike që Serbia i mori nga Kosova, dhe në fund të paguhen dëmet e luftës nga ana e Serbisë.
3. Bashkëpunimi në të ardhmen.
4. Të drejtat që serbët e Kosovës i kanë në veri, t’i kenë edhe shqiptarët në Bujanoc dhe Preshevë.
5. Rishqyrtimi i marrëveshjeve të mëparshme.
6. Si dhe marrëveshja përfundimtare.
Ai po ashtu ka rrëfyer se si pala kosovare ka qenë kategorike që targat e veturave të kenë akronimin RKS dhe se e kanë refuzuar në mënyrë automatike propozimin e Beogradit./FolDrejt/
