Programi Botëror i Ushqimit i OKB-së (WFP) tha të martën se është detyruar të shkurtojë ndihmën e saj për sirianët që kanë nevojë për furnizime bazë ushqimore me rreth gjysmën pas mungesës së fondeve, raporton AA, përcjell Fol Drejt.
“Një krizë e paprecedentë financimi në Siri po detyron Programin Botëror të Ushqimit të Kombeve të Bashkuara (WFP) të shkurtojë ndihmën për 2.5 milionë nga 5.5 milionë njerëz që mbështeten tek agjencia për nevojat e tyre bazë ushqimore,” tha agjencia në një deklaratë.
Ai shtoi se pas “shterrimit të të gjitha opsioneve të tjera”, mori vendimin për të shtrirë burimet e tij “jashtëzakonisht të kufizuara” duke i dhënë përparësi “tre milionë sirianë që nuk janë në gjendje t’ia dalin nga një javë në tjetrën pa ndihmë ushqimore”.
WFP gjithashtu vuri në dukje se nëse vazhdon të ofrojë ndihmë për 5.5 milion njerëz, do të “mbetej pa ushqim plotësisht deri në tetor”.
“Në vend që të rritemi apo edhe të mbajmë ritmin me nevojat në rritje, ne po përballemi me skenarin e zymtë të heqjes së ndihmës nga njerëzit, pikërisht atëherë kur ata kanë më shumë nevojë për të”, tha Përfaqësuesi i WFP dhe drejtori i vendit në Siri Kenn Crossley.
Deklarata e WFP erdhi pasi Bashkimi Evropian është planifikuar të presë Konferencën e shtatë të Brukselit mbi “Mbështetje të së ardhmes së Sirisë dhe rajonit” të mërkurën.
Siria është zhytur në një luftë të egër civile që nga fillimi i vitit 2011, kur regjimi i Bashar al-Assad shtypi protestat pro-demokracisë me egërsi të papritur.
Gjatë dekadës së fundit, rreth gjysmë milioni njerëz janë vrarë dhe më shumë se 12 milionë janë detyruar të largohen nga shtëpitë e tyre. /FolDrejt/
