Ish-përfaqësuesi i lartë në Bosnje dhe Hercegovinë, Wolfgang Petritsch, tha se BE-ja po kërkon themelimin e një Bashkësie të Komunave me shumicë serbe, e cila nuk ka as pushtet ekzekutiv e as legjislativ dhe nuk është tipi i Republikës Sërpska, e cila, sipas opinionit të tij, është një shembull shumë i keq, shkruan Klix, përcjell Fol Drejt.
“Sigurisht, të gjithë janë për të pasur një shoqatë që nuk ka pushtet ekzekutiv e as legjislativ, që nuk është tipi i RS. Ne nuk e duam këtë. Ne kemi një përvojë shumë të keqe. Unë kam qenë një përfaqësues i lartë në BiH dhe e di sa e vështirë është të përballesh me RS-në”, tha Petritsch dhe shtoi se komuniteti ndërkombëtar është absolutisht kundër një modeli të tillë.
Ai e cilësoi propozimin franko-gjerman për çështjen e Kosovës si një hap të ndërmjetëm drejt njohjes reciproke të Kosovës dhe Serbisë. Ai tha se rruga evropiane e Serbisë kushtëzohet me njohjen e Kosovës dhe njëkohësisht i bëri thirrje kryeministrit Kurti dhe presidentit Vuçiq që përfundimisht të marrin një vendim politik për mbështetjen dhe zbatimin e propozimit gjermano-francez.
Petritsch tha se përmes propozimit BE-ja dëshiron të përshpejtojë negociatat me Beogradin, por në të njëjtën kohë të shtyjë kërkesën e Prishtinës për anëtarësim në BE.
I pyetur nëse i beson presidentit serb Aleksandër Vuçiq që të miratojë të gjithë paketën e propozimit gjermano-francez, Petritsch theksoi se ky është një vendim i vështirë për çdo politikan serb.
“Ju e dini se Vuçiq ka një opozitë të madhe në vendin e tij. Ne kemi ndjekur trazirat në parlamentin serb dhe këto nuk janë shenja shumë të mira. Por unë mendoj dhe i kthehem asaj që thashë më herët, guximi politik është i rëndësishëm sot. Tani ne duhet të shohim Vuçiqin, i cili ka shumicën dërrmuese në vend, të dalë dhe të thotë sado e vështirë të jetë – ne do ta bëjmë këtë”, tha Petrisch për Gazzetta Express.
Kur bëhet fjalë për Asociacionin e Komunave Serbe, Petritsch tregon se do të jetë pjesë e shtetit sovran të Kosovës, i cili ka para vetes përmbushjen e obligimit të marrë 10 vjet më parë.
Petritsch theksoi se Kisha Ortodokse dhe manastiret luajnë një rol të rëndësishëm në jetën e të gjithë serbëve dhe Prishtina duhet të këshillohet që ta marrë seriozisht këtë çështje.
“Kam vizituar banorët e Deçanit dhe At Savën, i cili është i hapur dhe i cili gjatë luftës ka qenë ndër serbët e paktë në Kosovë që ka biseduar dhe ka vazhduar të ketë kontakte me shqiptarët e Kosovës. Ai natyrisht thotë se duhet të ketë një status të veçantë për manastiret dhe kishat ortodokse në Kosovë, dhe kjo është ajo që po them”, shtoi ai. /FolDrejt/
