Një xhami në Gjermaninë veriperëndimore u vandalizua nga mbështetësit e organizatës terroriste PKK, njoftuan autoritetet të hënën, raporton AA, përcjell Fol Drejt.
Sulmuesit shkruan parrulla të ndryshme në muret e xhamisë Bad Bentheim, e cila drejtohet nga shoqata Unioni Turko-Islamik për Çështjet Fetare (DITIB).
Hakki Gumuskusak, kryetari i shoqatës së xhamive, ka dënuar sulmin dhe u ka bërë thirrje autoriteteve gjermane që të marrin masat e nevojshme të sigurisë.
“Ne nuk do të lejojmë që këta autorë të cenojnë paqen dhe sigurinë në qytetin tonë. Shpresojmë që ky incident të zgjidhet sa më shpejt nga autoritetet”, tha ai.
Policia lokale në Bad Bentheim ka apeluar për dëshmitarë dhe ka kërkuar nga këdo që ka informacion që të dalë dhe të ndihmojë në hetimin e incidentit.
Vitet e fundit, shumë xhami janë vënë në shënjestër të ndjekësve të organizatës terroriste PKK. Megjithatë, vetëm disa incidente kanë rezultuar në arrestimin dhe ndjekjen penale të autorëve, duke garantuar vendosjen e drejtësisë.
PKK, e klasifikuar si një organizatë terroriste “etno-nacionaliste” nga agjencia e zbatimit të ligjit të BE-së, Europol, është e ndaluar në Gjermani që nga viti 1993. Megjithatë, ajo mbetet aktive në vend me afro 14,500 ndjekës në mesin e popullsisë emigrante kurde.
Turqia i ka kërkuar prej kohësh aleatit të saj në NATO, Gjermanisë që të ndërmarrë veprime më të forta kundër PKK-së, duke theksuar se grupi terrorist e përdor vendin si një platformë për aktivitete rekrutimi, propagande dhe mbledhje fondesh.
Në fushatën e saj terroriste më shumë se 35-vjeçare kundër Turqisë, PKK ka qenë përgjegjëse për vdekjen e rreth 40,000 njerëzve. /FolDrejt/
