Më 27 shkurt në Bruksel pritet ballafaqimi ndërmjet Kryeministrit Albin Kurti dhe Presidentit të Serbisë Aleksandër Vuçiq, shkruan Fol Drejt.
Pjesëmarrjen në këtë takim e kanë pranuar të dy palët, ndërsa në tryezë do ta kenë propozimin evropian për normalizim të marrëdhënieve.
Përfaqësuesi i Lartë për Politikë të Jashtme i Bashkimit Evropian Josep Borell për Deutche Welle e ka konfirmuar këtë takim:
“Po, do të takohem me të dy në Bruksel më 27 shkurt, po i kam ftuar për të pasur një ditë të plotë diskutime. Është një propozim në tryezë. Shpresoj që ata të jenë në gjendje ta pranojnë këtë propozim si rrugë për t’i normalizuar marrëdhëniet mes tyre”.
Në anën tjetër Kryeministri Kurti nuk është shprehur me shumë entuziazëm për takimin, por ka thënë se pret që diskutimet të vazhdojnë duke iu referuar Planit franko-gjerman i cili mbetet bazë e diskutimeve:
“Ne e kemi propozimin evropian me iniciativë franko-gjermane, që tashmë kemi konstatuar që është edhe bazë e mirë për diskutime të mëtutjeshme.”
Mirëpo për sa i përket Asociacionit, si pikë problematike e diskutimeve, ai është rezervuar të flas, ndërsa ka thënë se shpreson se pala ndërmjetësuese nuk do ta shikojë vetëm njërën palë:
“…nga dita e hënë kur zhvillohet takimi i radhës i takimit të lartë ne presim që edhe të ketë diskutime të mëtutjeshme edhe të ecim përpara mbi bazën e atij propozimi, mirëpo për gjërat e tjera nuk mund të flasim tani edhe për shkak se jo pak varet nga fasilituesit apo ndërmjetësit. Janë pesë fjali të preambulës me 10 nene, besoj që do t’i përmbahen propozimit që kanë marrë dhe jo interesit të njërës palë. Pas ditës së hënë do të mund të dimë më shumë se çka e kur.”
Ua kujtojmë që para pak javësh në parlament, kryeministri i artikuloi hapur kushtet e Kosovës për Asociacionin e komunave me shumicë serbe, i cili nuk mund të pranohet sipas versionit të marrëveshjeve 2013 dhe 2015-të:
- Asociacioni duhet të jetë në përputhje me Kushtetutën dhe ligjet në fuqi në Republikën e Kosovës;
- Asociacioni nuk mund të jetë monoetnik, duhet të ndërrojë emrin, nuk mund të ketë/bartë asnjë pushtet publik apo ekzekutiv dhe duhet t’i shërbejë vetëm bashkëpunimit horizontal të komunave sipas Kushtetutës dhe ligjit për vetëqeverisje lokale;
- Të drejtat e pakicave kombëtare dhe mekanizmat mbrojtës përkatës duhet ta ngërthejnë parimin e reciprocitetit ndërmjet dy shteteve respektive si dhe të marrin parasysh standardet dhe modelet evropiane;
- Para vendosjes së Asociacionit, strukturat ilegale të Serbisë në veri shuhen dhe bëhet dorëzimi i të gjitha armëve ilegale;
- Asociacioni është pjesë e marrëveshjes finale dhe zbatohet pas njohjes reciproke. Dhe vetëm pasi Serbia t’i ketë pranuar parimet e Kartës së Organizatës së Kombeve të Bashkuara në raportet e saj ndërshtetërore me Republikën e Kosovës; dhe:
- Presidenti i Serbisë t’i tërheq letrat e dërguara te pesë shtetet anëtare të BE-së, dhe tek të tjerat, për mospranimin e aplikimit të Republikës së Kosovës për anëtarësim në Bashkimin Evropian që paraqet edhe shkelje të po asaj marrëveshjeje Thaçi-Daçiq të 19 prillit 2013.
Edhe Vuçiq e ka pranuar se në Bruksel do të bëhet përpjekje për të gjetur një zgjidhje të problemit, prandaj sipas tij, ai do të jetë një takim i vështirë. Sipas tij, ai pret që në Bruksel Kryeministri Kurti të insistoj që Serbia ta pranojë fajin, por po ashtu pret që të bisedohet edhe për Asociacionin.
Në anën tjetër në Kosovë insistimi i ndërmjetësve ndërkombëtarë që Prishtina zyrtare ta pranojë Asociacionin, është manifestuar me një pakënaqësi të shprehur në masë të madhe, e artikuluar edhe nëpërmjet protestave. Vetë Kryeministri aktual dikur e cilësonte “Zajednicën” si “të vdekur”.
Nga eksponentët e partisë në pushtet, sikundër edhe vetë zyrtarëve, kjo nuk është një zhvendosje e madhe nga qëndrimet e kahershme të këtij subjekti, e nga kritikët po shpjegohet si shkelje flagrante e parimeve.
“Asociacioni për Kosovën në formën si është bërë në 2015-tën dhe 2013-tën nënkupton një bosnjëzim të ri, ndërsa për Serbinë nënkupton fitonte një Republika Sërbska të re” – tha për MCN TV njohësi i zhvillimeve politike Gurakuç Kuçi para disa ditësh. Kosova dhe Serbia duke qenë nën presionin e ShBA-ve dhe të BE -së, po kalojnë një fazë bukur kritike, por që sipas Kuçit, askush nuk pret që të hënën t’i zgjidhin të gjitha mosmarrëveshjet.
Kryeministri Kurti pritet ta mbrojë qëndrimin e tij në lidhje me këtë çështje, ashtu siç edhe e ka artikuluar pozicionin e vetë në paraqitjet publike, “jo duke e nxjerr qerren para kalit”, pra pa e anuar vëmendjen e procesit te çështja e Asociacionit./FolDrejt/
