Presidenti ukrainas Volodymyr Zelensky po zhvillon një takim në Paris me homologun e tij francez Emmanuel Macron, raporton Ukrinform, përcjell Fol Drejt.
“Emmanuel Macron priti presidentin ukrainas Volodymyr Zelensky në Pallatin Elysee”, thuhet në mbishkrimin e videos.
Zelensky mbërriti në Paris nga Gjermania të dielën. Ai do të ketë një darkë pune me Macron në Pallatin Elysee.
Pallati Elysee raportoi më herët se gjatë takimit, Macron do të “riafirmojë mbështetjen e pandërprerë të Francës dhe Evropës për të rivendosur të drejtat legjitime të Ukrainës dhe për të mbrojtur interesat e saj themelore”. Biseda mes dy liderëve do të “përqendrohet në mbështetjen që Franca vazhdon të japë si përgjigje ndaj nevojave urgjente ushtarake dhe humanitare të Ukrainës”.
“Të dy presidentët do të diskutojnë gjithashtu perspektivat afatgjata për kthimin e paqes në Evropë, veçanërisht në bazë të Planit të Paqes të propozuar nga Presidenti Zelensky, të cilin Franca e mbështet”, tha Pallati Elysee. /FolDrejt/
