Presidenti i Ukrainës thotë se trupat e tij po qëndrojnë në dy qytete kyçe në rajonin lindor të Donbasit, pavarësisht sulmeve të përsëritura.
Presidenti Zelenskyy e quajti taktikën “të çmendur”, teksa bëri fjalimin e tij të zakonshëm të mbrëmjes, raporton SkyNews, transmeton Fol Drejt.
Ai tha se luftimet më të ashpra ishin afër Avdiivka, jashtë Donetsk, dhe Bakhmut, më në verilindje.
“Këtu çmenduria e komandës ruse është më e dukshme. Ditë pas dite, për muaj të tërë, ata po i çojnë njerëzit drejt vdekjes atje, duke përqendruar nivelin më të lartë të goditjeve artilerie,” tha ai.
Rusia është përpjekur vazhdimisht të kapë Bakhmutin, i cili është në rrugën kryesore për në qytetet Sloviansk dhe Kramatorsk të kontrolluara nga ukrainasit.
Trupat armike sulmuan Bakhmutin tetë herë para drekës në një ditë të caktuar, tha të martën këshilltari presidencial Oleksiy Arestovych. Megjithatë, ata u shtynë çdo herë.
Presidenti nuk përmendi se çfarë po ndodhte pranë qytetit jugor Kherson, i cili ende mbahet nga forcat pro-ruse, por tha se ai priste një luftë të ashpër atje.
“Në përgjithësi, ne po forcojmë pozicionet tona në të gjithë vijën e frontit, duke zvogëluar aftësitë e pushtuesve, duke shkatërruar logjistikën e tyre dhe duke përgatitur një lajm të mirë për Ukrainën,” tha ai./FolDrejt/
