Dje, me dekrete presidenciale, presidenti ukrainas Volodymyr Zelensky shkarkoi nënkryetarin e Shërbimit të Sigurisë së Ukrainës (SBU), Oleksandr Yakushev, menaxherët e dy departamenteve dhe drejtuesit e SBU në dy rajone të Ukrainës.
Zyrtarët e shkarkuar janë kreu i Departamentit për Mbështetjen Ekonomike Oleksandr Provotorov, kreu i Departamentit për Mbrojtjen e Sekreteve Shtetërore dhe Licencimin Ihor Nosko, kreu i SBU në Zaporizhia Oblast Boris Bezrukji dhe kreu i SBU në Sumy Oblast Eduard Fedorov.
Zelensky tashmë ka emëruar njerëz të rinj në dy nga pesë pozitat vakante, shkruan Kyiv Independent, përcjell Fol Drejt.
Këto nuk janë ndryshimet e para në shërbimin sekret ukrainas që nga fillimi i pushtimit rus, pasi kreu i SBU, Ivan Bakanov, u shkarkua në korrik të vitit të kaluar. Më 7 shkurt, parlamenti ukrainas emëroi Vasilij Maliuk si kreun e ri.
Një fushatë e madhe kundër korrupsionit filloi në fillim të shkurtit
Aktivistët kundër korrupsionit thonë se Maliuk është i afërt me Oleh Tatarov, zëvendës-shefin famëkeq të kabinetit të presidentit ukrainas. Tatarov u akuzua për ryshfet në vitin 2020, por çështja u pushua përfundimisht, me disa spekulime se çështja u pushua sepse Tatarov ushtronte ndikim të madh në polici dhe gjyqësor.
Maliuk u emërua si shefi i ri vetëm disa ditë pas një operacioni anti-korrupsion, në të cilin u kontrolluan shtëpitë e oligarkut të fuqishëm Ihor Kolomoisky dhe ish-ministrit të brendshëm Arsen Avakov. Ky veprim në shkallë të gjerë ishte pjesë e përpjekjeve të qeverisë ukrainase për t’i provuar Perëndimit se po lufton vërtet korrupsionin./FolDrejt/
