Presidenti Volodymyr Zelensky tha sot se Ukraina nuk ishte e përfshirë në vdekjen e raportuar të Yevgeny Prigozhin, themeluesit të Wagner Group, i cili u rendit si pasagjer i një avioni privat që ishte rrëzuar në Rusi, njoftoi agjencia e lajmeve Interfax-Ukraine.
“Ne nuk kemi asnjë lidhje me këtë. Të gjithë e kuptojnë se kush e ka,” u tha Zelensky gazetarëve në Kiev.
Avioni privat Embraer Legacy u rrëzua pranë fshatit Kuzhenkino në Tver Oblast teksa po fluturonte nga Moska për në Shën Petersburg mbrëmjen e 23 gushtit, duke vrarë të 10 personat në bord, shkruan Kyiv Independent.
Prigozhin, i cili kishte nisur një rebelim jetëshkurtër kundër Kremlinit në fund të qershorit, supozohet të jetë mes të vdekurve.
Sipas Institutit për Studimin e Luftës, Putin “pothuajse me siguri urdhëroi komandën ushtarake ruse të rrëzonte aeroplanin e Prigozhin”. Shkaku i rrëzimit dhe vdekja e kryekomandantit ende nuk janë konfirmuar.
Mediat ruse kanë raportuar se të 10 trupat janë gjetur dhe transportuar në Tver për ekspertizë mjeko-ligjore.
Mykhailo Podolyak, një këshilltar i shefit të zyrës presidenciale, komentoi se “është e qartë se Putini nuk fal askënd për terrorin e tij kafshëror”.
“Eleminimi demonstrativ i Prigozhin dhe komandës Wagner dy muaj pas përpjekjes për grusht shteti është një sinjal nga Putin për elitat e Rusisë përpara zgjedhjeve të vitit 2024. “Kujdes! Mosbesnikëria është e barabartë me vdekjen”, shkroi zyrtari në platformën X (i njohur më parë si Twitter).
