Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, mori pjesë në tryezën e diskutimit me temë “Raporti i Zgjerimit: Çfarë ka në të për Kosovën?”.
Pjesë e këtij paneli ishte dhe ambasadori i BE-së në Kosovë, Tomas Szunyog dhe pjesëmarrës nga shoqëria civile.
Në fjalën e tij hyrëse, zëvendëskryeministri tha se në situatën e krijuar nga efektet e post-pandemisë e inflacioni dhe kriza energjetike shkaktuar nga lufta në Ukrainë, me rëndësi është aftësia e Qeverisë që të ndërhyjë në momentin e duhur, në mënyrë të targetuar. Elementi më i rëndësishëm është stabiliteti politik, i cili ka mundësuar pikërisht adresimin e shpejtë dhe të targetuar mirë të masave të Qeverisë ndaj nevojave të qytetarëve, transmeton Fol Drejt.
Prioritetet e qeverisjes sonë, përqendrohen në dy fusha kyçe si drejtësia dhe ekonomia. Për ne është i rëndësishëm rezultati që arrijmë sidomos në këtë drejtim. Ky raport, i potencon dhe reflekton të arriturat e Qeverisë në 12 muajt e fundit. Sidomos për sa i përket zhvillimit ekonomik, shifrat, statistikat, faktet dhe vlerësimet edhe nga Banka Botërore, Fondi Monetar Ndërkombëtar e shumë të tjera, riafirmojnë dhe pasqyrojnë këto të arritura.
Zëvendëskryeministri Bislimi foli dhe mbi strategjitë dhe reformat e ndërmarra nga Qeveria, të cilat janë vlerësuar dhe në Raportin për Vendin./FolDrejt/
