Zëvendëskryeministri i Kosovës, Besnik Bislimi a pritur në takim përfaqësuesit e Misionit të FMN-së, të udhëhequr nga Gabriel Di Bella, shkruan Fol Drejt.
“Zëvendëskryeministri i parë për Integrim Evropian, Zhvillim dhe Dialog, i Republikës së Kosovës, Besnik Bislimi, priti në takim përfaqësuesit e Misionit të FMN-së, të udhëhequr nga z. Gabriel Di Bella. Gjatë takimit u diskutua rreth punës dhe analizave të misionit në lidhje me Kosovën e gjithashtu dhe bashkëpunimin e mbështetjen e FMN-së ndaj Qeverisë së Republikës së Kosovës.”, shkruan në njoftimin zyrtar.
Përfaqësuesit e Misionit të FMN-së i kanë vlerësuar pozitivisht qasjet dhe strategjitë e Qeverisë në përballimin e krizave të shumëfishta, formalizimin e aktiviteteve të ekonomisë dhe krijimin e një vizioni për të ardhmen prosperuese të vendit. Ata kanë shprehur gatishmërinë për të ndihmuar me asistencë të mëtejme teknike dhe gjetjen e formave të tjera të thellimit të bashkëpunimit. Kujtojmë se edhe në raportin e fundit të FMN-së, Kosova është vlerësuar pozitivisht, me rritjen dhe performancën më të mirë nga vendet e Ballkanit Perëndimor.
“Palët diskutuan dhe mbi mungesën e stabilitetit në tregun energjetik ndërkombëtar dhe efektet e saj në Evropë dhe rajon, të cilat janë ndjerë dhe në Kosovë. Qeveria ka marrë masa efikase për të lehtësuar barrën e krizës energjetike dhe efektet e saj tek qytetarët. Duke i falënderuar dhe vlerësuar për bashkëpunimin përmes projekteve dhe mbështetjes së tyre, zëvendëskryeministri Bislimi theksoi se mirëpret përkrahje të mëtejme nga Fondi Monetar Ndërkombëtar për të tejkaluar sfidat e përbashkëta me të cilat përballet Kosova, rajoni dhe Evropa.”, thuhet në fund të raportit. /FolDrejt/
