Ushtarët rusë duhet të mbahen përgjegjës për përdhunimin e grave ukrainase dhe kryerjen e akteve të tjera të dhunës seksuale gjatë luftës së Rusisë në Ukrainë, tha zonja e parë e saj, Olena Zelenska, në një konferencë ndërkombëtare për parandalimin e dhunës seksuale në konflikte, shkruan Al Jazeera, transmeton Fol Drejt.
Zelenska tha në takimin në Londër se dhuna seksuale po ushtrohet “sistematikisht dhe hapur” ndërsa lufta në Ukrainë po zvarritet. Regjistrimet telefonike kanë treguar ushtarë rusë duke diskutuar hapur për përdhunimin me të afërmit e tyre në shtëpi, tha Zelenska.
“Dhuna seksuale është mënyra më mizore, më shtazarake për të provuar zotërimin mbi dikë”, tha ajo. “Dhe për viktimat e kësaj lloj dhune, është e vështirë të dëshmosh në kohë lufte, sepse askush nuk ndihet i sigurt.”
“Kjo është një tjetër armë në arsenalin e tyre në këtë luftë dhe konflikt,” tha ajo. “Kjo është arsyeja pse ata po e përdorin këtë sistematikisht dhe hapur.”/FolDrejt/
