Anulohet përfundimisht sezoni futbollistik 2019-2020 në një prej ligave më të rëndësishme në Europë, transmeton Supersport Albania.
Vendimi i qeverisë holandeze për të mos lejuar deri në datën 1 shtator zhvillimin e asnjë aktiviteti sportiv për shkak të emergjencës nga koronavirusi, ka sjellë shtyrjen zyrtarisht të këtij edicioni të Eredivisies.
Titulli do të mbetet vakant me Ajaxin dhe Az Alkamaarin dy skuadrat kryesuese që duhet t’i bëjnë llogaritë me edicionin pasardhës.
Në këtë sezon nga kategoria nuk do të bjerë asnjë skuadër me Den Haag, Fortuna Sittard dhe RKC Walwijk që kanë përfituar nga anulimi i kampionatit, ndërkohë që nga ky vendim i qeverisë holandeze penalizohen skuadrat e ligës së dytë që nuk do të ngjiten dot në elitë përfshirë këtu edhe Cambuur që kryesonte me 11 pikë avantazh nga ndjekësja më e afërt.
