Ministri i Kutlurës, Rinisë dhe Sportit, Hajrulla Çeku, ka njoftuar se sot është zyrtarizuar marrëveshja që Kosova të organizojë Kampionatin e Hapur Evropian të Xhudos, raporton Fol Drejt.
“Sukseset e xhudistëve tanë nëpër botë janë të pamatshme. E emocionet që na dhurojnë nëpër gara, erdhi koha t’i përjetojmë edhe në Kosovë. Më 16 dhjetor, Prishtina për herë të parë do të jetë nikoqire e Kampionatit të Hapur Evropian të Xhudos, ku do të marrin pjesë mbi 40 shtete.”, shkroi Çeku në Facebook.
Çeku njoftoi se në takimin e sotëm me presidentin e Federatës Evropiane të Xhudos, László TOTH, zëvendës presidentin e Federatës Evropiane të Xhudos, Hrvoje Lindi, presidentin e Federatës së Xhudos në Kosovë, Agron Kuka, trajnerin Driton Kuka, zëvendësministren, Daulina Osmani dhe shefen e kabinetit në MKRS, Klodeta Krasniqi, është nënshkruar marrëveshja që zyrtarizon këtë ngjarje të madhe për shtetin e Kosovës.
“Kampionati do të organizohet në kuadër të programit shtetëror “Kosova, shtet i xhudos”, i cili në kohë rekord po tregon rezultate konkrete për sportistët dhe të ardhmen e të rinjve tanë.”, shtoi ministri Çeku.
Ai theksoi se përfitimet e Kosovës përmes këtij organizimi do të jenë direkte. Konsolidim i imazhit shtetëror në arenën ndërkombëtare, përforcim i përkatësisë dhe identitetit shtetëror, ndikim në përmirësimin e infrastrukturës fizike sportive, ekonomi dhe zhvillim i turizmit sportiv. /FolDrejt/
