Shtëpia e futbollit evropian, UEFA, ka njoftuar sot se ndeshja ndërmjet Kosovës dhe Izraelit, në kuadër të Grupit I për kualifikimet Euro 2024, e planifikuar të zhvillohej më 15 tetor në stadiumin “Fadil Vokrri” është shtyrë.
Kjo u bë e ditur për FolDrejt.com nga FFK-ja edhe gjatë ditës së djeshme, megjithatë sot kjo tashmë është publikuar edhe zyrtarisht.
Deri te ky vendim UEFA ka ardhur si pasojë e situatës së krijuar së fundmi në Izrael, ku është shpallur gjendje lufte, e si rrjedhojë autoritetet izraelite aktualisht nuk lejojnë asnjë prej ekipeve sportive të udhëtojnë jashtë vendit.
UEFA ka bërë të ditur se me kohë do të njoftojë për datën e re të kësaj ndeshjeje./FolDrejt/
