Momqillo Trajkoviq, kryetar i Forumit Kombëtar Serb, ka thënë se zyrtarët e Listës Serbe janë larguar nga Kosova, shkruan Fol Drejt.
Ai këtë e ka quajtur një akt që dëshmon disfatën politike të serbëve në Kosovë:
“Kjo është disfata e politikës serbe në Kosovë. Nëse nuk bëhet diçka, serbët e Kurtit do të dalin në skenë” – ka thënë Trajkoviq.
Sipas tij, Lista Serbe e ka humbur mbështetjen e popullit, ndonëse vijon ta gëzon njëfarë mbështetjeje nga Beogradi zyrtar.
Trajkoviq ka paralajmëruar që janë duke punuar për ta riaktivizuar Këshillin Kombëtar Serb, i cili është planifikuar për 26 gusht.
Por Trajkoviq nuk është i vetmi që e thotë se Lista Serbe e ka humbur mbështetjen te masa e gjerë serbe në Kosovë. Edhe deputeti i Kuvendit të Serbisë, Mirosllav Aleksiq ka pohuar se serbët në Kosovë janë të zemëruar me Listën Serbe.
“Janë të zemëruar me listën Serbe dhe mua më duket se gjithnjë e më shumë prej tyre janë të zemëruar si me Aleksandar Vuçiqin ashtu edhe me regjimin në Beograd. Ata e ndjejnë se janë tradhtuar, të lënë pas dore. Këtë e kam dëgjuar në rrugë, në barrikada, nga profesorët, pensionistët, nga të gjithë”, ka thënë Aleksiq.
Lista Serbe është duke u tronditur pasi serbët e Kosovës tani nuk po i binden kësaj partie. Pas trazirave të fundit në veri të Kosovës, të shkaktuara nga grupet kriminale serbe, për herë të parë liderët e Listës Serbe janë fyer e akuzuar publikisht, ndërsa ndaj tyre janë drejtuar edhe fjala si “tradhti, tradhti”.
Për gjatë kësaj periudhe së pushtetit absolut në zonat serbe në Kosovë, kjo parti udhëhoqi protesta dhe ngriti barrikada të shumta me qëllim të kundërshtimit të autoriteteve të Republikës së Kosovës.
Nga protestat e fundit në veri të vendit, në rrjete sociale janë shpërndarë video ku shihen edhe incidente në të cilat zyrtarët e kësaj partie, nuk janë kursyer./FolDrejt/
