Një muaj i përgjakshëm në Gaza rezulton të ketë qenë fatal për 4,237 fëmijë dhe 2,2719 gra nga 10,328 të vrarë, sa janë raportuar gjithsej, shkruan Fol Drejt.
Sipas Al Jazeera-s, veç të vrarëve, edhe mbi 25,000 civilë janë plagosur.
Reuters shkruan se forcat ushtarake Izraelite kanë rrethuar shtëpinë e një të tretës së 2.3 milionë banorëve palestinezë, me pretekstin për të asgjësuar luftëtarët e Hamasit.
Bilanci i përgjakshëm ka goditur edhe gazetarët dhe reporterët e terrenit. Sipas Anadolu Agency (AA), 48 gazetarë kanë humbur jetën qëkur filluan luftimet.
Javë më parë një ekspert i OKB-së për të drejtat e njeriut paralajmëroi se palestinezët janë në rrezik të madh të spastrimit masiv etnik, ndërsa iu bëri thirrje komunitetit ndërkombëtar që urgjentisht të ndërmjetësojë në një armëpushim midis Hamasit dhe forcave pushtuese izraelite.
“Situata në territorin e pushtuar palestinez dhe në Izrael ka arritur një nivel të lartë”, tha Francesca Albanese, Raportuesja Speciale e OKB-së për situatën e të drejtave të njeriut në territorin palestinez të pushtuar që nga viti 1967.
Ndonëse zyrtarët izraelitë në vazhdimësi kanë provuar t’i justifikojnë sulmet brutale në Gaza duke thënë se, cak i sulmeve nga toka dhe ajri, ishin pjesëtarët e Hamasit, sikurse edhe bazat dhe infrastruktura e organizatës, në të vërtetë, më së shumti ka pësuar popullata civile.
Lufta e pabarabartë dhe numri i lartë i viktimave civile në Gaza, kanë nxitur një valë reagimesh në shumë vende të botës. Megjithatë, thirrjet për ndërhyrje të menjëhershme dhe vendosje të armëpushimit, deri më tani, kanë hasur në vesh të shurdhër.
Nga shumë ekspertë ushtarakë, nuk përjashtohet mundësia që konflikti të zgjerohet. Sipas tyre nëse tani nuk ndërhyhet për të vendosur armëpushimi i menjëhershëm, “mbajtja nën kontroll” e Hezbollahut dhe fraksioneve të tjera që kanë dënuar ashpër gjenocidin dhe tentimin për spastrim etnik në Gaza, do të jetë i pamundur për një kohë të gjatë.
Ua kujtojmë që që nga fillimi i konfliktit, avionët luftarakë izraelitë, veç bombardimeve mbi Rripin e Gazës, kanë sulmuar dy aeroporte në Siri dhe një xhami në Bregun e uzurpuar Perëndimor, e cila gjoja përdorej nga militantët.
Sulme brutale, arrestime e vrasje ka pasur edhe në pjesë të tjera të Palestinës si në West Bank dhe në pjesë të tjera të territorit të pushtuar.
Nga raportimet nga terreni, mësymjet e para të këmbësorisë izraelite kanë dështuar, ndërsa janë përballur me sulme të befasishme të pjesëtarëve të Hamasit. Ushtria izraelite ka pranuar se, gjatë konfrontimeve, ka pasur të vrarë dhe të plagosur nga ana e tyre. Video të shkurtra të publikuara në rrjetin Telegram, shfaqin momente të ndryshme të përballjeve të pjesëtarëve të Hamasit me mjetet e blinduara të trupave izraelite.
Gjasat që të arrihet një armëpushim i përkohshëm, sipas njohësve të zhvillimeve atje, hë për hë, janë të vogla./FolDrejt/
