Aleksandar Vuçiq nuk i frikësohet aq shumë gazit, më shumë i frikësohet çështjes së Kosovës, sepse është diçka të cilën mund ta shfrytëzojë Moska, por shumë më shumë i frikësohet popullaritetit të Rusisë në opinionin publik, shkruajnë mediat serbe, transmeton Fol Drejt.
Kështu të paktën po konsideron një pjesë e opinionit të gjerë në Serbi.
Sipas raportimeve të mediave serbe, ai është përpjekur ta zhvendos vëmendjen te një çështje tjetër: forcimin e ushtrisë. Duke folur në Panairin e Armëve në Abu Dhabi, Vuçiq njoftoi se Serbia do të nënshkruajë kontratën e parë me Emiratet e Bashkuara Arabe për blerjen e dronëve vetëvrasës nga ai vend. Vuçiq po ashtu tha se “shpreson” që për pesë deri në gjashtë muaj, në Ushtrinë Serbe të mbërrijnë dronët e parë vetëvrasës vendas dhe ka paralajmëruar se deri në fund të vitit do të modernizohen 40 tanke që ka në dispozicion të Ushtrisë.
“Është një model sjelljeje, ka imperativ për zëvendësimin e armëve të vjetra, por ka edhe motive të tjera që e shtyjnë udhëheqjen serbe. Të parat janë politike – mendohet se nëse keni më shumë armë, i bënë pazaret më mirë, se arrin marrëveshje më të mirë kur bëhet fjalë për mosmarrëveshjet rajonale. Në teori kjo është e vërtetë, por në praktikë sjell rreziqe nëse e mbivlerëson. Unë u shpreha se, nuk duhet të hidhen plumba në Ballkan që të bëhen dëme. Prandaj biseda për armët është e rrezikshme sepse helmon marrëdhëniet politike dhe e bënë edhe më të keq besimin shumë të dobët të aktorëve në skenën politike”, u shpreh Vuksanoviq, një zyrtar nga Qendra e Beogradit për Politikë të Sigurisë.
Megjithatë, sipas tij loja e Vuçiqit në këtë rast, është thjesht një blof:
“Dhe se ata janë të vetëdijshëm se Vuçiq, si kushdo tjetër në Ballkan, ka rrezik të bëjë vetëvrasje politike po qe se do të përpiqej ta përqendronte forcën në mënyrë të njëanshme, veçanërisht tani kur sytë e Perëndimit janë përqendruar në rajon më shumë se kurdoherë. Këto negociata për Kosovën me propozimin franko-gjerman në fokus, nuk janë produkt i dëshirës për të zgjidhur mosmarrëveshjen e Kosovës, por për të mbyllur hapësirën për praninë ruse. Perëndimi ka arritur në përfundimin se lidhja ndërmjet Beogradit dhe Moskës është ndërprerë shkaku i çështjes së Kosovës”, shtoi ai.
Duke folur për marrëdhëniet mes Serbisë dhe Rusisë, ai theksoi se jo të gjitha lidhjet janë ndërprerë dhe se me shumë mundësi kjo nuk do të ndodh plotësisht:
“Po hyjmë në një periudhë ku marrëdhëniet me Perëndimin do të jenë më të forta se me Moskën. Ata janë më të fortë për arsye objektive, nuk mund të flasim për ndikim rus kur Lavrov nuk mund të vijë në Beograd dhe ne nuk mund të importojmë naftë ruse. Armët ruse nuk mund të na dorëzohen. Ndikimi rus gjithmonë ka qenë i ekzagjeruar, por ai ka instrumente specifike – energjinë, mosmarrëveshjen e pazgjidhur të Kosovës dhe popullaritetin rus. Ndikimi nuk është në praninë ushtarake apo partneritetet ekonomike, por sepse Beogradi varet nga vetoja në OKB dhe popullariteti i madh, ku politikanët kanë frikë të marrin qëndrime anti-ruse për të mos zemëruar atë pjesë të elektoratit”, shtoi studiuesi na Qendra e Beogradit për Politika të Sigurisë.
Duke komentuar fjalimin e presidentit të Rusisë, Vladimir Putin, e më pas edhe të presidentit amerikan Joe Biden, Vuksanoviq ka theksuar se nuk kemi bërë asnjë përparim që nga fillimi i luftës në Ukrainë. Rreziku që efektet e luftës të përhapen edhe në vendet e tjera, sipas tij, është i madh, ndërsa gjasat që ajo të përfundojë gjatë këtij viti, janë të vogla./FolDrejt/
