Jorn Rohde, ambasador i Gjermanisë në Kosovë, ka paralajmëruar orë të vështira diplomatike për Kosovën, shkruan Fol Drejt.
Në një intervistë dhenë për Radio Kosovën, Rohde ka thënë se Kosova dhe Serbia duhet të marrin vendime të vështira politike “sepse nuk ka më kohë për shtyrjen e problemeve të pazgjidhura.”
Sipas Rohde, Gjermania e ka në prioritet dialogun Kosovë – Serbi, ndërsa po punon që Kosova të marrë së shpejti liberalizimin e vizave.
“Shpresojmë se fundi i dialogut do të sjellë me vete edhe fundin e të gjitha problemeve ekzistuese aktuale. Gjatë vizitës së kancelarit gjerman Scholz në Kosovë, ai theksoi ato që Qeveria gjermane i ka nënvizuar gjithnjë; se të dy vendet synojnë anëtarësimin në Bashkimin Evropian, ndërsa është e paimagjinueshme që Bashkimi Evropian të pranojë dy vende që nuk e njohin njëri-tjetrin. Pra, është plotësisht e qartë se njohja reciproke, duhet të jetë rezultati përfundimtar i procesit të dialogut dhe kjo është e qartë për ne” – ka thënë ai ndër të tjera, duke shtuar se, megjithatë, ka ende shumë rrugë për të bërë.
Sa i përket Asociacionit të komunave me shumicë serbe, ambasadori gjerman thekson se me marrëveshjen e Brukselit, Kosova ka marrë për obligim edhe themelimin e Asociacionit të komunave serbe dhe se pret që kjo marrëveshje të zbarohet në praktikë.
“Ne presim që edhe kjo marrëveshje të zbatohet në praktikë, natyrisht në harmoni me Kushtetutën e Kosovës dhe natyrisht që Asociacionit të mos fokusohet si një ‘republikë serbe’”, ka deklaruar ambasadori Rohde.
Rohde po ashtu ka folur edhe për çështjen e liberalizimit të vizave, për ç’gjë ai ka thënë se mund të ndodhë së shpejti.
“…besoj se nëse gjithçka shkon ashtu siç duhet, në pranverën e vitit të ardhshëm nuk do të flasim më për këtë temë”, ka përfunduar ai./FolDrejt/
