Mbretëria e Bashkuar ka njoftuar një marrëveshje me Turqinë për të rritur bashkëpunimin në trajtimin e migracionit të parregullt, e cila përfshin një “qendër të re ekselence” operacionale që do të krijohet nga Policia Kombëtare Turke, shkruan Al Jazeera, transmeton Fol Drejt.
Londra e njoftoi planin të martën në mbrëmje, si pjesë e përpjekjeve të saj për të reduktuar migrimin e parregullt në MB, një çështje kyçe politike.
Qendra e re e mbështetur nga Mbretëria e Bashkuar do të “pasurojë ekspertizën ekzistuese në të dy vendet në lidhje me aktivitetet që synojnë ndërprerjen e rrjeteve kriminale që organizojnë udhëtime të paligjshme”, sipas një deklarate nga ministria e brendshme britanike.
Mbretëria e Bashkuar do të vendosë gjithashtu më shumë oficerë në Turqi për të penguar bandat kriminale që drejtojnë rrugët e parregullta të migrimit.
Të dy vendet përsëritën angazhimin e tyre për të punuar së bashku për të trajtuar problemin dhe për të forcuar bashkëpunimin me vendet e origjinës dhe tranzitit.
