Mediat në Beograd shkruajnë se Ministri i Punëve të Jashtme i Serbisë, Ivica Daçiq, ka thënë se nga ShBA-të nuk kanë ardhur asnjë provë për akuzat kundër kreut të Agjencisë së Informacionit të Sigurisë (BIA) Aleksandar Vulin, i cili u sanksionua nga autoritetet amerikane, duke shtuar se “ai nuk pret që të arrijnë, sepse nuk bëhet fjalë për vendosjen e provave, por për sanksione të motivuara politikisht”, transmeton Fol Drejt.
“Ne nuk kemi marrë asnjë informacion nga Amerika, madje as një indikacion se ka ndonjë akt kriminal të përfshirë. Sigurisht që do të kërkojmë shpjegim nga Shtetet e Bashkuara, sepse kjo nuk është një çështje private, por një vendim i drejtuar kundër një zyrtari të lartë të qeverisë. Por, le ta lëmë mënjanë, motivi i këtij vendimi është politik” – citohet të ketë thënë Daçiq në një intervistë për të përditshmen Politika.
Duke folur për arsyen pse u vendosën këto sanksione, Daçiç tha se bëhej fjalë për “qëndrimet e Vulinit ndaj Rusisë”.
“Nëse ne do të kishim vendosur sanksione ndaj Rusisë, nuk do të kishte sanksione kundër Vulin apo dikujt tjetër”, tha Daçiq.
I pyetur se si kjo mund të ndikojë në marrëdhëniet Serbi-SHBA, ministri tha se Serbia “ka bashkëpunim të mirë me SHBA-në në luftën kundër të gjitha formave të krimit të organizuar”.
“Është një nga shtyllat më të rëndësishme të bashkëpunimit tonë të përgjithshëm. Dhe pikërisht për këtë është për t’u habitur që autoritetet shtetërore amerikane marrin vendime për sanksione ndaj një zyrtari të lartë të Serbisë, me dyshime për gjoja lidhje me krimin e organizuar. Por këtu po flasim vetëm për politikë, e kjo është politika shtetërore e Serbisë, të cilën e zbatojnë të gjithë ata që janë në krye të institucioneve”, theksoi ai.
Daçiq po ashtu ka vlerësuar se me këtë veprim “ata duan të krijojnë një ekuilibër artificial” mes Beogradit dhe Prishtinës. Ai vlerësoi se “pas vendimeve të ashpra të Perëndimit dhe Amerikës ndaj pushtetit në Prishtinë, ishte vetëm çështje ditësh se kur do të arrinte një vendim kundër Beogradit”.
“Kjo nuk ka qenë kurrë një politikë e mirë, sepse nuk mund të krijosh një ekuilibër mes Prishtinës, e cila me vite vazhdimisht ka minuar dialogun, ka përdorur dhunë dhe nuk dëshiron zgjidhje, dhe Beogradit, i cili e mban gjallë dialogun dhe përmbush gjithçka që është rënë dakord. ka thënë Daçiq./FolDrejt/
