Ministri i Punëve të Jashtme të Serbisë, Ivica Daçiq, tha se pa formimin e Asociacionit të Komunave Serbe si çështje e parë e Marrëveshjes së Ohrit, nuk ka përmbushje të pjesëve të tjera të saj.
“Nuk është se Marrëveshja e Ohrit nuk është më e vlefshme, por këtu po flasim për faktin se gjëja e parë në Marrëveshjen e Ohrit është Asociacioni. Nëse nuk ka Asociacion, atëherë nuk ka as pjesë të tjera të asaj marrëveshjeje”, tha Daçiq në programin e mëngjesit të RTS.
Daçiq tha se mënyra se si shtetet votojnë për fillimin e procedurës për shqyrtimin e kërkesës së Kosovës për anëtarësim në KE do të ndikojë në mënyrën se si Beogradi do t’i trajtojë ato shtete në të ardhmen.
“Mali i Zi të paktën mund të ishte i përmbajtur. Ne duhet të veprojmë në mënyrë reciproke. Mali i Zi votoi për pranimin e Kosovës. Edhe ata do të kenë nevojë dikur për votën tonë, në të cilën sigurisht nuk do të mund të llogarisin”, tha kreu i diplomacisë.
Daçiq shtoi se është befasuar në mënyrë të pakëndshme nga zëri i Ukrainës, sepse Serbia dënon shkeljen e integritetit territorial të atij vendi në të gjitha rezolutat në mbarë botën dhe Kievi abstenoi.
“Greqia dhe Sllovakia më befasuan. Ministri nga Greqia është nderuar nga presidenti i Serbisë Aleksandar Vuçiq. Presidenti i Greqisë foli për faktin se ata nuk e njohin Kosovën”, tha Daçiq, transmeton Fol Drejt.
