Tërheqja e Rusisë nga marrëveshja e grurit në Detin e Zi pritet të rrisë çmimet e ushqimeve në Azi, por ndikimi do të jetë i heshtur për momentin, thonë analistët, për shkak të reduktimit të importeve nga Ukraina dhe rritjes së ofertës nga vendet e tjera, raporton Al Jazeera, transmeton Fol Drejt.
Sipas marrëveshjes së Detit të Zi, Azia mori 46 për qind të dërgesave me drithëra dhe produkte të tjera ushqimore, ndërsa Evropa Perëndimore dhe Afrika morën respektivisht 40 për qind dhe 12 për qind.
Kina ka qenë përfituesi më i madh i vetëm i eksporteve, sipas shifrave të OKB-së, duke marrë 7.7 milionë tonë ose gati një të katërtën e totalit. Importet e Kinës përfshinin 5.6 milion ton misër, 1.8 milion ton miell farash luledielli, 370,000 ton vaj luledielli dhe 340,000 ton elb.
