Lëvizja Vetëvendosje (LV), ka arsye për t’u shqetësuar, ndërsa gjithnjë e më shpesh po flitet për prishje koalicioni, rritje të pakënaqësisë dhe “dezertime” deputetësh nga fronti i mazhorancës. Të gjitha këto, mund të lënë gjurmë brenda koalicionit, e madje edhe ta ndryshojnë rrjedhën e zhvillimit politik në vend, transmeton Fol Drejt.
Vendi ka kaluar nëpër kriza të vazhdueshme, këtu e dy dekada, pa mundur të gëzojë një periudhë më të gjatë të stabilitetit politik, e për rrjedhojë edhe ekonomik. Vetëvendosje ka ardhur në pushtet me premtime se, do t’ia dalë mbanë me krijimin e këtij stabiliteti, mirëpo, kritikët e saj nuk janë duke parë asgjë konkrete në horizont.
Koalicioni në kolovajzë?
Vetë koalicioni qeveritar, përkundër spekulimeve, duket i qëndrueshëm, përkundër paralajmërimit se mund të ketë çarje të reja. Sot, jo më larg, Partia e Ashkalinjve për Integrim (PAI), u tha se ka vendosur të dalë nga koalicioni, por lajmi u demantua disa orë më vonë.
Megjithatë, përkundër mungesës së stabilitetit, faktorët të cilët mund ta rrëzojnë këtë koalicion nga pushteti, janë të jashtëm dhe jo të brendshëm. Të paktën kështu i kanë thënë Fol Drejt, disa burime. Po sipas këtyre burimeve, vetë Kryeministri Albin Kurti ka qenë i paralajmëruar me kohë për këto rreziqe. Atij i është sugjeruar një investim milionësh, si preventivë për krizën energjetike. Projekti në fjalë është shqyrtuar nga pala vendore, por ka ngecur i bllokuar, për arsye që nuk dihen, nga disa dikastere ministrore.
Thuhet se Ministria e Punëve të Jashtme e udhëhequr nga Donika Gërvalla, është fajtore për këtë zvarritje, por hë për hë, bëhet fjalë vetëm për spekulime. Fol Drejt i ka kontaktuar institucionet në fjalë, për të mësuar nëse ka diçka të vërtetë në këto thashetheme, por ato kanë zgjedhur të heshtin. Jo-zyrtarisht, disa nga zyrtarët e lartë në vend, kanë thënë se hë për hë “nuk kanë çfarë të thonë” për këto çështje. Pyetja i është dërguar direkt edhe ministres Gërvalla, por as ajo nuk është përgjigjur.
Shumë zhurmë për shumëçka
“Kemi qymyr për 1000 vjet, duke qenë vendi më i pasur në botë me rezerva. Por, Kosova nuk mund të prodhojë rrymë as për veti. Kaq arritëm për 20 vjet. I ndërtuam, apo na i ndërtoi ish Jugosllavia dy termocentrale para 60, përkatësisht 40 vjetësh. Ato janë stërvjetëruar dh epos rrymës, prodhojnë edhe ndotje në lokalitetin më të populluar në vend. Kjo është per tu turpnu. I bie sikur Arbabia Saudite të blinte naftë prej vendeve tjera, ose Rusia të blinte gaz natyror” – shkruante zëdhënësi i KEDS-it para disa muajsh. Emri i tij u lakua mjaft edhe këto ditë, ndërsa u përfshi në polemika në distancë me Ministren e Ekonomisë Artane Rizvanolli. Ishte kjo e fundit që kërcënoi me dërgimin e një dosjeje në polici.
Nuk dihet nëse Ministrja Rizvanolli e dërgoi këtë dosje me dëshmi në polici, por dihet që polemika nxiti edhe grupet e tjera të reagojnë. Sot u mbajt një protestë paqësore, pikërisht për këtë çështje.
Burimet e ripërtërishme, alternativë e pashfrytëzuar
Era, dielli dhe uji, të cilësuara si burime të ripërtërishme, si resurse, nuk shfrytëzohen mjaftueshëm. Në Kosovë, një projekt i madh, premtues, është filluar në vargmalet që i ndajnë dy qytetet veriore të Kosovës: Mitrovicës dhe Podujevës. 27 turbina, që kanë kapacitet për prodhimin e 105 megavatëve për orë, veç janë vendosur në këtë pjesë të vendit. Kompania Sowi-Kosova, është përgjegjëse për krijimin e këtij parku. Kompania ka bashkuar firma nga Kosova, Izraeli dhe Gjermania, ndërsa synohet mbulimi i 10% të kapaciteteve prodhuese të energjisë.
Në përgjithësi, nga rreth gjashtë milionë megavat energji elektrike sa prodhohen gjatë vitit në Kosovë, më pak se 180 mijë megavat në vit prodhohen në formë të energjisë së pastër.
Qeveria varet nga politikat e gjelbra
Në nëntor të këtij viti, është mbajtur takimi i Grupit Punues për hartimin e Strategjisë së Energjisë 2022-2031. Në këtë mbledhje pat qenë pjesëmarrës edhe Kryeministri Kurti, ku ndër të tjera qe zotuar se politikat e prodhimit të të ashtuquajturës “energji e pastër”, do të jenë prioritet për qeverinë.
“Për 20 vjet nuk ka pasur studim në fushë e energjisë. Duhet të sigurojmë furnizim për qytetarët dhe bizneset. Synimet tona në energji, janë në përputhje me reformat që po prezantohen në botë, ku një takim i tillë u mbajt në Glasgou. Kjo është strategjia e parë për energji e përpiluar nga ana e ekspertëve. Strategjia jonë e energjisë do të jetë drejtë energjisë së pastër, duke pasur praktika të njëjta si në Evropë, ShBA e në shumë vende tjera”.
Me këtë rast, ai qe zotuar se ngadalë, por sigurt, Kosova do të ecë drejt realizimit të këtyre politikave. Fol Drejt ka mësuar se projektet që i janë sugjeruar kabinetit të Kurtit, për investim, kanë të bëjnë pikërisht me “prodhimin e energjisë së pastër”, politikë kjo e pajtuar edhe me ato për ruajtjen e ambientit. Megjithatë, përveç strategjisë së hartuar, Qeveria Kurti nuk ka bërë ndonjë hap konkret drejt realizimit të këtyre projekteve./FolDrejt/
