Ministri egjiptian i Naftës, Tarek El-Molla, ka bërë të ditur se vendi i tij ka zbuluar një rezervë të madhe të gazit natyror në bllokun Nargis në Mesdheun Lindor.
Sipas gazetës ‘Al-Ahram’, ministri El-Molla tha se vlerësimi akoma është në vazhdim për të përcaktuar rezervat e fushës së gazit natyror, shkruan AA, transmeton Fol Drejt.
Në një takim informues para një komisioni parlamentar, El-Molla theksoi se zbulimi i fundit është më i rëndësishmi pas zbulimit në fushën e gazit ‘Zohr’ shtatë vite më parë.
Në vitin 2015, kompania italiane e energjisë ‘Eni’ zbuloi gaz natyror në rajonin ‘Zohr’ pranë brigjeve të Egjiptit.
Ministri egjiptian tha se detajet për sasinë e rezervës së gazit do të njoftohen në ditët në vijim. Vlerësohet se ka afro 1 trilionë metër kub të rezervave të gazit në ‘Nargis-1X’.
‘Nargis’ është një nga katër blloqet e eksplorimit në det të hapur, ku kompania ‘Chevron’ ka interesa operative në Egjipt së bashku me kompaninë ‘Tharwa Petroleum Co.’./FolDrejt/
