Kancelari gjerman, Olaf Scholz dhe kryeministri belg, Alexander De Croo, kanë deklaruar se Gjermania dhe Belgjika duan të thellojnë bashkëpunimin e tyre për çështjet e energjisë me synimin për neutralitetin e ardhshëm të klimës.
Kancelari Scholz pas takimit me kryeministrin De Croo tha se 12 muajt e fundit edhe një herë në mënyrë mbresëlënëse kanë treguar “sa e rëndësishme është të punohet ngushtë së bashku në Evropë, veçanërisht në çështjet e energjisë”, shkruan AA, transmeton Fol Drejt.
Dy liderët u takuan në portin belg Zeebrugge për takimin e parë gjermano-belg mbi energjinë, me bisedime të fokusuara në atë se si mund të rrjedhë më shumë energji midis dy vendeve në të ardhmen.
Kryeministri De Croo njoftoi se Belgjika dëshiron të dyfishojë kapacitetin e saj për të furnizuar Gjermaninë me gaz natyror të lëngshëm (LNG). Puna për këtë duhet të fillojë këtë vit.
Me ndërprerjen e furnizimit me gaz rus shtatorin e kaluar, Belgjika u bë një nga furnizuesit më të rëndësishëm për Gjermaninë. Kapacitetet e dorëzimit janë shfrytëzuar plotësisht për shtrirje të gjata.
Sipas dy liderëve, infrastruktura që po ndërtohet duhet të jetë e përdorshme edhe për hidrogjen. De Croo gjithashtu njoftoi se Berlini dhe Brukseli planifikojnë të lidhin infrastrukturën e tyre të hidrogjenit deri në vitin 2028.
“Përmes rritjes së bashkëpunimit, ne do të rrisim prodhimin e hidrogjenit për ekonomitë tona dhe do të sigurojmë që lëndët e para dhe energjia të jenë në dispozicion për industritë tona”, tha De Croo.
Gjermania synon të bëhet neutrale ndaj klimës deri në vitin 2045, ndërsa Bashkimi Evropian (BE) ka vendosur këtë objektiv deri në vitin 2050.
Scholz tha se zgjerimi i rrjeteve të energjisë në mënyrë që njerëzit në Evropë të mund të ndihmojnë njëri-tjetrin është kritik.
Scholz dhe De Croo theksuan se zgjerimi i rrjeteve evropiane po ashtu rrit sigurinë e furnizimeve./FolDrejt/
