Deputeti i Kuvendit të Kosovës, Ardian Gola, ka njoftuar se së bashku me deputeten Hykmete Bajrami kanë marrë pjesë në konferencën rajonale “Mbikëqyrja parlamentare – Ndërtimi i besimit ndërmjet parlamenteve”, e cila u organizua në kuadër të programit rajonal të NDI WBLSI dhe në bashkëpunim me Bundestagun gjerman, shkruan Fol Drejt.
“Në kuadër të programit rajonal të NDI WBLSI, dhe në bashkëpunim me Bundestagun gjerman, nga data 28 – 29 mars 2023 u zhvillua konferenca rajonale “Mbikëqyrja parlamentare – Ndërtimi i besimit ndërmjet parlamenteve”.
Qëllimi i kësaj konference është të ndihmojë parlamentet në rajon në forcimin e kapaciteteve të tyre për ligjbërje, mbikëqyrje dhe përfaqësim. Bashkëpunimi i zgjeruar dhe të mësuarit krahasues brenda rajonit u ofrojnë parlamenteve një burim të rëndësishëm pasi trajtojnë pengesa të ngjashme organizative dhe legjislative.”, shkroi Gola në Facebook.
Gola tha se në këtë konferencë, Kuvendi i Republikës së Kosovës u përfaqësua nga ai si Kryetar i Komisionit për Arsim, Shkencë, Teknologji, Inovacion, Kulturë, Rini dhe Sport, dhe Hykmete Bajrami, Kryetare e Komisionit për Mbikëqyrjen e Financave Publike. Ndërsa të pranishëm në këtë konferencë në kuadër të delegacionit nga Republika e Kosovës ishin edhe Artan Murati, Menaxher i Programit në NDI dhe Agron Demi, përfaqësues nga shoqëria civile.
“Në një seri aktivitetesh që mbështesin ndërtimin e besimit ndaj parlamenteve, në bashkëpunim me Bundestagun gjerman, kjo konferencë ka bashkuar deputetë dhe përfaqësues të shoqërisë civile nga vendet e Ballkanit Perëndimor dhe ato të BE-së për të diskutuar mbi mbikëqyrjen parlamentare si një nga çelësat e llogaridhënies dhe transparencës, si dhe një nga hapat më të rëndësishëm në ndërtimin e besimit të publikut në institucionet dhe proceset publike.”, shkroi në fund Gola. /FolDrejt/
