Ushtria izraelite ka vrarë të paktën tre palestinezë dhe ka plagosur katër të tjerë ndërsa gjuajti me plumba të vërtetë gjatë një bastisjeje në qytetin verior të Nablusit, raporton Al Jazeera, përcjell Fol Drejt.
Ministria palestineze e Shëndetësisë konfirmoi se tre palestinezë u vranë nga forcat izraelite të enjten.
“Fytyrat e dy prej dëshmorëve janë deformuar plotësisht për shkak të zjarrit të madh me të cilin u goditën, duke e bërë të vështirë identifikimin e tyre”, tha ministria.
Ushtria izraelite dhe shërbimi i inteligjencës thanë në një deklaratë se dy nga burrat e vrarë qëndronin pas të shtënave më 7 prill në veri të Jerikos, në të cilën dy motra kolone vdiqën kur persona të armatosur hapën zjarr mbi automjetin e tyre. Nëna e tyre vdiq më vonë nga plagët e marra.
Në Qytetin e Vjetër të Nablusit, Gjysmëhëna e Kuqe Palestineze tha se katër persona u transferuan në spital dhe të paktën 150 persona pësuan inhalim të gazit lotsjellës, përfshirë nxënës të shkollave, gjatë bastisjes izraelite.
Fraksionet politike në Nablus njoftuan një grevë të përgjithshme në qytet të enjten në përgjigje të sulmit.
Ushtria izraelite dhe kolonët kanë vrarë të paktën 110 palestinezë, 20 prej tyre ishin fëmijë, deri më tani në 2023.
Shifra përfshin gjithashtu të burgosurin palestinez 44-vjeçar Sheikh Khader Adnan, i cili vdiq të martën në ditën e 87-të të një greve urie kundër ndalimit të tij të përsëritur arbitrar.
Vdekja e Adnanit, i cili u arrestua më 5 mars dhe ishte në pritje të gjyqit ushtarak, shkaktoi zemërim dhe protesta të përhapura në Bregun Perëndimor të pushtuar dhe çoi në sulme me raketa ndaj Izraelit nga grupet e armatosura të rezistencës në Rripin e rrethuar të Gazës.
Të martën mbrëma, një palestinez 58-vjeçar, Hashel Mubarak, u vra në sulmet ajrore izraelite në Rripin e Gazës dhe pesë të tjerë u plagosën. /FolDrejt/
