Liverpool viziton Southamptonin të dielën në orën 17:30 në xhiron e fundit, ndeshjen e 38 të Premier League.
Liverpooli pritet ta mbyllë sezonin në vendin e pestë dhe do të luajë në Ligën e Evropës, gjë që është pozitive duke pasur parasysh fillimin katastrofik të sezonit. Trajneri Jürgen Klopp ka mbajtur një konferencë për shtyp para ndeshjes me klubin e fundit të ligës angleze.
Pikërisht për këtë u përfol se shumë lojtarë mund të largoheshin nga klubi, veçanërisht ata që do të donin të luanin në Champions League sezonin e ardhshëm, kompeticionin më të madh të klubeve në Evropë. Ideja për t’u larguar nga klubi vetëm për Champions League nuk është diçka që i pëlqen Kloppit, ndaj ai u dërgoi një mesazh të qartë lojtarëve të tij nga konferenca e shtypit.
“Nëse ndonjë lojtar vjen tek unë dhe thotë se dëshiron të largohet sepse ne nuk jemi kualifikuar në Ligën e Kampionëve, unë do ta çoj atë në atë klub tjetër me makinën time. Do të marr çelësat dhe do ta pyes se ku dëshiron të shkosh. ‘Do të të dërgoj unë’, këtë do t’i them. Është diçka që nuk e kuptoj fare”, tha Klopp në konferencën për shtyp, transmeton Fol Drejt.
