Sipas informacioneve nga Vitia, dhjetëra-qindra libra janë djegur në oborrin e shkollës “Njazi Rexhepi” në fshatin Sadovinë e Çerkezëve. Nga fotografitë që shihen, vërehet që ka pasur një numër të konsiderueshëm të librave të djegur në oborrin e shkollës, të cilat paraprakisht ishin të hudhura në sallat shkollore e nëpër tokë.
Shkruan: Gëzim Olluri
“Qytetërimi ynë po e shkatërron vetveten”, është nji frazë në librin ‘Farenhajt 451’ nga Ray Bradbury. Në të personazh kryesor është një zjarrvënës, Montagu. Detyra e tij është të shkatërrojë mallin e jashtëligjshëm – librat. Duket se personazhi i Rai Bradburit është shfaqur edhe në Komunën e Vitisë. Mirëpo, mbetet enigmë nëse personazhi për shkatërrimin e djegien e librave gjendet jashtë apo brenda institucioneve komunale.
Duke i vështruar fotografitë, bëhet fjalë për dhjetëra-qindra lektyra e libra të hudhura në klasat shkollore e të shkatërruara para se ato të përfundonin të djegura në oborr. Gjithsesi, duhet theksuar që institucionet shkollore brenda nji komune veprojnë nën ombrellën e Drejtorisë Arsimore Komunale.
“Drejtoria e Arsimit në kuadër të kompetencave, autorizimeve dhe përgjegjësive ligjore të saja (Ligjit nr 03/L-068), si dhe udhëzimeve administrative të MASHTI-t, Statutit të Komunës së Vitisë dhe të politikave strategjike të Kryetarit të Komunës në fushën e veprimtarisë së saj është kompetente dhe obligohet t’i kryej: udhëheqjen, menaxhimin dhe koordinimin e strukturës së arsimit publik parashkollor, fillor dhe të mesëm në komunë”, thuhet ndër të tjera në web-faqen e Drejtorisë Arsimore – Viti.
Bazuar në informacionet që i ka publikuar Dega e AAK-së në Viti, aludohet se lektyrat e librat janë djegur në oborrin e Shkollës Fillore “Njazi Rexhepi” në Sadovinë. Siç mësohet nga të dhënat e publikuara, objekti shkollor ishte shndërruar në konteiner të mbeturinave e qindra libra janë hedhur në oborrin e shkollës. Pasi që shkolla dhe oborri janë pastruar, librat janë djegur.
“Dy ditë më parë ishim për vizitë tek shkolla e vjetër “Njazi Rexhepi” në Sadovinë të Çerkezëve pasi kjo shkollë ishte kthyer në konteiner të mbeturinave ku me qindra libra ishin hedhur përtokë. Denoncimi ynë me foto të bashkangjitura kishte bërë “mrekulli”. Tanimë shkolla “Njazi Rexhepi” ishte pastruar dhe asgjë nuk kishte mbetur nga mbeturinat”, thuhet në shkrimin e Degës së AAK-së në Viti.
Nga ana tjetër, dega e Aleancës për Ardhmërinë e Kosovës në Viti, përgjegjësinë për djegien e librave ia adreson organeve komunale që janë treguar neglizhente. Ndër të tjera, bazë pamjeve fotografike shkolla duket që nuk është funksionale pasi shihen dyer e dritare të thyera. Dhe mbetet e paqartë se pse librat nuk janë larguar kur shkolla ka dalë jashtë funksionit.
“Komuna e Vitisë nuk kishte mbetur pa e shprehur edhe njëherë averzionin e saj për librin. Ajo i kishte djegur librat në oborrin e shkollës. Gjë që, në mos qoftë një krim ekonomik, është një mëkat simbolik që përçon mesazh të fortë tek nxënësit, prindërit e qytetarët për raportin e vërtetë që ka ky pushtet me arsimin, diturinë dhe librin”.
Mediumi “FolDrejt”, i ka kontaktuar institucionet komunale në Viti për të marrë qartësime dhe informacione se kush qëndron prapa djegies së librave dhe pse nuk i kanë bartur në ndonjë bibliotekë publike a shkollore.
Pas publikimit të shkrimit, nga ana e Drejtorisë Arsimore, kanë potencuar se nga viti 2016 shkolla e zhvillon mësimin në objektin e ri dhe gjërat në objektin e vjetër kanë qenë të papërdorshme. Siç mësohet, librat dhe lektyrat aty janë nga viti 2016 megjithëse nga Drejtoria Arsimore thonë që aty mund të ketë pasur fletë fletoresh ose librash, të cilat mund të jenë sjellë nga jashtë brenda shkollës.
“Shkolla “Njazi Rexhepi”, që nga viti 2016 mësimin e zhvillon në objektin e ri si paralele e shkollës amë. Objekti i shkollës për të cilën flitet është objekt i vjetër dhe i ka shërbyer shkollës edhe si një hapësirë për të futur gjësende të ndryshme. Nga pamjet e shpërndara në rrjetet sociale shihet se aty dikush mund të ketë ndezur ndonjë zjarr por gjësendet dhe gjërat që kanë mundur të jenë aty, janë të vjetra dhe të papërdorshme”, kanë shkruar nga DKA.
Drejtoria Arsimore shton që se aty mund të ketë pasur fletë fletoresh apo librash që janë sjellur nga jashtë. “Mund të ketë pasur ndonjë ndonjë fletë të librave apo fletoreve e ndoshta gjësende që kanë mundur t’i sjellin aty personat e papërgjegjshëm kur dihet se objekti është i thyer dhe i demoluar. Ne si DKA kemi marrë masa duke e rregulluar dhe pastruar, por nuk mund të sigurojmë se prapë nuk do të demolohet. Mirëpo, nga zjarri nuk janë dëmtuar dokumente apo libra valide, por bashkë me drejtorinë e shkollës bazë veprimeve ligjore do të kërkojmë llogari dhe përgjegjësi për ndezje të zjarrit”.
Nga ana tjetër, Vitia akoma nuk ka objekt biblioteke dhe veprimtaria e bibliotekës publike në qytetin e Vitisë vepron në ambientet e Shtëpisë së Kulturës.
