Ministria e Unifikimit e Koresë së Jugut ka shprehur “keqardhje të thellë” për paradën ushtarake të Koresë së Veriut për nder të 70-vjetorit të përfundimit të Luftës Koreane dhe i kërkoi Phenianit të zgjedhë rrugën “e duhur” për paqen, njoftoi agjencia e lajmeve Yonhap.
“Na vjen thellësisht keq që pavarësisht 70-vjetorit të përfundimit të konfliktit, Koreja e Veriut po vazhdon konfrontimin dhe zhvillimin e armëve bërthamore në vend që të kërkojë një rrugë drejt denuklearizimit dhe paqes”, tha zëdhënësi i ministrisë Koo Byoungsam në një konferencë.
Ai gjithashtu i kërkoi Phenianit të pezullojë zhvillimin e armëve bërthamore dhe të zgjedhë rrugën “e duhur”.
Deklarata e ministrisë erdhi pasi Koreja e Veriut shfaqi dronët e saj të fundit të zbulimit dhe raketat balistike ndërkontinentale Hwasong-18 gjatë një parade ushtarake në Phenian më 27 korrik.
