Nga Ramiz Duka
Janë disa momente kur nuk vlejnë partitë dhe ideologjitë, kur bien argumentet e pozitës e të opozitës, kur nuk është e rëndësishme se kush është kryeministër e kush është kryetar partie në opozitë. Ato janë çastet kur kombi kërcënohet dhe kur rrezikohet qenia kombëtare dhe shtetërore.
Nëpër një moment të tillë po kalon këto ditë në Kosova jonë. Serbët e Kosovës, sigurisht nën urdhrat e Serbisë, kanë vendosur ta sabotojnë shtetin e Kosovës, duke i braktisur institucionet e Kosovës dhe duke e vënë si kusht për t’u kthyer formimin e Asociacionit të Komunave Serbe. Këtij prushi i fryn vetë Serbia, së cilës ia bën me sy Rusia e egërsuar e Putinit.
Prandaj, duke u ndodhur në kësi momenti, dëshiroj t’u bëj thirrje të gjithë shqiptarëve që të bashkohemi, pa dallim partie e ideologjie, pa dallime feje e përkatësie tjetër, sepse vetëm të bashkuar mund t’i dalim zot atdheut. Një fitore që është arritur me gjak, nuk guxojmë të humbet për shkak të pakujdesisë ose inateve.
Duke qenë të bashkuar dhe duke e pasur mbështetjen e aleatit tonë të madh – Shteteve të Bashkuara të Amerikës, sigurisht duke u mbështetur në Fuqinë Absolute të Zotit, jam i sigurt se do t’ia dalim./FolDrejt/
