Kryeministri i Republikës së Kosovës Albin Kurti sot në konferencën për shtyp, i ka mohuar edhe një herë pretendimet e palës serbe se policët e rrëmbyer ndodheshin në territorin e Serbisë. Sipas kryeministrit, ata ndodheshin madje thellë brenda territorit të Kosovës, shkruan Fol Drejt.
Ndërsa i prezantoi dëshmitë para gazetarëve, Kryeministri Kurti tha se policët e rrëmbyer ndodheshin 1 kilometër larg kufirit në anën veri-perëndimore, 670 metra nga pjesa veriore dhe 300 metra në jug perëndim.
Kurrsesi nuk bëhet fjalë “për arrestim në Serbi por për kidnapim në Kosovë” – tha ai, duke shtuar se pjesëtarët e Policisë së Kosovës nuk kishin kaluar në territorin e Serbisë, ashtu siç po pretendohet nga Beogradi zyrtar.
“Në vendin e ngjarjes kanë qenë KFOR-i dhe PK dhe aty janë gjetur edhe gjurmë të çizmeve të huaja në drejtim të Serbisë, pranga lidhëse plastike. Ajo çfarë mua vazhdon të më habis është që KFOR-i deri më tani nuk del zyrtarisht me shpjegim se ku është ky vend, e ky vend është në Kosovë. Edhe automjeti edhe ushqimi që kanë ngrënë policët gjithçka është thellë në territorin e Kosovës” – u shpreh ndër të tjera Kryeministri Kurti.
Sipas tij bëhet fjalë për “formacione të armatosura të Serbisë” me të cilët duhet të merret KFOR-i. Më konkretisht sipas tij bëhet fjalë për njësinë speciale antiterroriste “CAJ” dhe njësinë speciale “Kobra”.
Ua kujtojmë se në një reagim ish zëdhënësi i KFOR-it në Kosovë Vincenzo Grasso ka thënë se nëse faktet tregojnë se këto njësi speciale serbe e kanë kaluar kufirin ilegalisht dhe e kanë kryer aktin, atëherë bëhet fjalë për shkelje të marrëveshjeve ushtarake dhe rezolutës 1244./FolDrejt/
