Futbolli nuk është thjesht një sport. Pasioni, emocionet, duelet, teknikat, fitoret dhe humbjet që shpërfaqen në “teatrin” e gjelbër, janë elemente që mblidhen për ta ndërtuar lapidarin e spektaklit. Shoqëritë e zhvilluara, e shfrytëzojnë atë edhe për ngjalljen e ndjenjave nacionaliste. Krenaria e të qenit brazilian, italian ose argjentinas, ndërlidhet shpesh me këtë sport të kthyer në kult për këto vende.
Nga Fol Drejt
Domonimi i kësaj sub-kulture në këto vende, shtrihet që nga akterët e fushës – futbollistët, trajnerët, mediat e profilizuara, komentatorët, referët, por edhe tifozët.
Shoqëritë e ndryshme shquhen për tradita të ndërtuara gjatë, me stilet e veçanta të lojës, dhe sidomos, emra futbollistësh që kanë lënë gjurmë të pashlyeshme në historinë e këtij sporti.
“La Nuestra” është një togfjalësh i shpikur nga shoqëria argjentinase, fjala vjen. Në shqip e ka kuptimin “rruga jonë”. Çfarë do të thotë kjo? Se argjentinasit e kanë kultivuar deri në skaj këtë subkulturë, në qendrën e së cilës ndodhen heronjtë si Maradona, Riquelme e Messi. I pari luftarak, i paepur, një figurë kontraverse që rrëzohej shpesh nga skandalet, aferat, dështimet jashtë fushës së gjelbër, për t’u ngritur në këtë të fundit, përsëri dhe përsëri, si mbret. Riquelme (Juan Román Riquelme), ndërkaq, ishte tjetër. Stili i lojës së tij, qe i një tjetër dimensioni. Ai kishte një aftësi kontrolli të jashtëzakonshme të topit. Vështirë mund t’i shkulej ai nga këmbët, meqë rrotullhej, tërhiqej, ecte me delikatesë ose pasohej me mjeshtri e saktësi tek bashkë lojtarët e tjerë. Messi, që vijon rrugën e dy të parëve, është, megjithatë, krejt i ndryshëm nga ta. Ai është spektakël!
Po. Argjentinasit e kanë la nuestra-n e tyre, po ne? Kush e pasoi Fadil Vokrrin? Cili është ai që po e trason rrugën sot?
Mbase tronditjet e mëdha të përjetuara nga ndryshimi i sistemeve, kanë lënë vërragë të thella në kujtesën tonë kolektive. Ne harrojmë. Duke qenë se harrojmë, nuk mund të ndërtojmë traditë, pra për rrjedhojë, nuk kemi as pse ta mbajmë mend këtë traditë.
“Historia ishte kundër nesh” – thonë disa apologjetë. Mbase është kështu. Imagjinojeni sikur Xherdan Shaqiri me të cilin do të përballen lojtarët tanë këtë fundjavë, të ishte i rreshtuar në kampin tonë. Atëherë edhe Kosova do të mund të thoshte se ka ndërtuar “La Nuestra-n” e saj. Emri i tij do të ishte i denjë si pasues i Vokrrit, apo jo? /FolDrejt/
