Kufijtë e Kosovës edhe pas 11 vjet pavarësi janë vendosur në pikëpyetje nga politika ndërkombëtare. Kjo është mjaft e rrezikshme, shkruan fillimisht media e njohur gjermane “Tages Anzeiger”.
Për “Tages Anzeiger” ka folur edhe profesoresha Evliana Berani, sipas së cilës pozicioni i Kosovës është përsëri i pasigurtë pas 20 vjetë luftë, përcjell foldrejt.com.
Nën presidentin amerikan Donald Trump, SHBA po kërkon të tërhiqet nga rajonet e luftës. Poashtu po kërkohet edhe një marrëveshje për Kosovën.
Ndarja e Kosovës mbështetet mbi të gjitha nga diplomati austriak dhe eksperti ballkanik, Wolfgang Petritsch. Ky i fundit po përpiqet të bind edhe Austrinë për të qëndruar pas idesë së ndarjes. Pro ndarjes ose shkëmbimit të territoreve janë edhe shefja e jashtme e BE-së, Federica Mogherini dhe presidenti francez Emmanuel Macron.
I vetmi shtet i madh kundër kësaj marrëveshje është Gjermania (siç kishit mundësi të lexoni në foldrejt.com, kundër ndarjes së Kosovës është edhe Zvicra), por kundër janë edhe banorët të cilët jetojnë në Luginën e Preshevës ose veriun e Kosovës.
Megjithatë “presioni i SHBA dhe Europës do rritet vazhdimisht”, mendon Evliana Berani. Një ndarje e Kosovës duhet të vendoset vetëm në parlament – ku asnjëherë nuk do gjejë shumicën./Foldrejt.com
