Prodhuesi gjerman i makinave luksoze Mercedes-Benz hapi sot zyrtarisht ndërtimin e një objekti riciklimi të baterive në Kuppenheim në jug të Gjermanisë.
Fabrika pilot do të ketë një kapacitet vjetor prej 2,500 tonësh dhe do të sigurojë materiale për prodhimin e më shumë se 50,000 moduleve të baterive për automjetet e reja elektrike Mercedes-Benz, përcjell Fol Drejt.
Kompania do të riciklojë bateritë nga automjetet e testimit dhe nga akumulatorët dhe mund të rrisë vëllimin e prodhimit në afat të mesëm dhe afatgjatë, në varësi të suksesit të projektit pilot.
“Ne po i dërgojmë një sinjal të rëndësishëm Gjermanisë në fushën e elektromobilitetit të qëndrueshëm”
Faza e parë e punimeve në uzinë duhet të nisë në dhjetor dhe përfundimi pritet disa muaj më vonë, në varësi të negociatave me shtetin.
Fabrika në Kuppenheim tashmë ka siguruar energji elektrike nga burime të rinovueshme dhe ndërtimi i saj financohet si pjesë e një projekti kërkimor shkencor të Ministrisë Gjermane të Ekonomisë dhe Mbrojtjes së Klimës.
“Ne po dërgojmë një shenjë të rëndësishme të fuqisë inovative në Baden-Württemberg dhe Gjermani në fushën e elektromobilitetit të qëndrueshëm,” tha Anëtari i Bordit të Mercedes-Benz për Menaxhimin e Zinxhirit të Prodhimit dhe Furnizimit Jörg Burzer.
Ministrja e Mjedisit, Klimës dhe Energjisë e Baden-Württemberg Thekla Walker tha se është e kënaqur që Mercedes-Benz po promovon temën e ekonomisë rrethore.
“Kjo është jashtëzakonisht e rëndësishme, duke pasur parasysh disponueshmërinë e kufizuar të lëndëve të para të rëndësishme dhe të kërkuara si litiumi, kobalti dhe nikeli,” shtoi Walker./FolDrejt/
