Ministri i Mjedisit, Planifikimit Hapësinor dhe Infrastrukturës, Liburn Aliu, ka njoftuar se është bërë prezantimi i rezultateve të hartave më të përshtatshme për energji nga era.
Aliu e bëri këtë të ditur përmes një postimi në facebook, me ç’rast njoftoi se këto harta do të jenë në shërbim të Ministrisë së Ekonomisë për politikat e tyre energjetike, komunave si dhe investitorëve që do të investojnë në Kosovë.
“Aktiviteti i Qëndrueshmërisë Energjetike (Energy Sustainability Activity) i Tetratech, financuar nga USAID, në bashkëpunim me Institutin për Planifikim Hapësinor, prezantuan rezultatet e hartave më të përshtatshme për energji nga era.
Pas publikimit të hartave të parcelave me potencial më të mirë për energji solare, ekipi i Ministrisë dhe Tetratech u angazhua për vitin 2022, që të bëjë identifikimit e zonave më të përshtatshme për projekte të energjisë me erë”, u shpreh ministri Aliu.
“Marrë parasysh parametrave kyç, sikurse shpejtësia konstante e erës në disa lartësi të caktuara të turbinave, pjerrtësinë, afërsinë me rrjetin e transmisionit, llojin e tokës, dhe faktorë tjerë që bëjnë diferencën në fizibilitet të projekteve me energji të erës, këto harta do të jenë në shërbim të Ministrisë së Ekonomisë për politikat e tyre energjetike, komunave si dhe investitorëve që do të investojnë në Kosovë”, shtoi ai tutje./FolDrejt/