Vërtet nuk është shumë i njohur, por ruan madhështinë e vet. I bllokuar për banorët vendas dhe të huajt për shkak të zonës kufitare, në malin Korab thuajse ka qenë e pamundur udhëtimi deri në vitet e para të shekullit të ri, por dalëngadalë erdhi deri te çbllokimi i tij dhe tani mjafton të kesh dëshirë, motivim dhe një letërnjoftim për të parë një bukuri të tillë.
Tunt, bën gjalpë, djathë, gjizë edhe punon pa përtuar;
Udhëtar’ e gjahëtorë, q’u bije udha ndër male,
U ep mish, qumësht, kos, dhallë, ajkë, djathë, bukëvale…
Një organizim i veçantë për në Korab ndodhi në 23 gusht 2020, ku klubi i sapo formuar dhe i mirëpërgatitur Dibra Off Road 4×4, kreu një udhëtim si asnjëherë më parë në këtë vend përrallor.
Historia e fillimit të një udhëtimi të paharrueshëm
Të rinjtë dibran me fouristradat, UTV-të dhe ATV-të e tyre u grumbulluan fillimisht në kafen Retro të Dibrës, ku pas sistemit dhe kafes së mëngjesit, ata nisen drejt një bukurie, që me gjasë edhe vetë nuk e dinin se do mbetnin të befasuar.
Pasi kalojnë magjistralen Dibër-Mavrovë, te kthesa për Prizren ata aktivizojnë gjithë arsenalin e tyre për të vozitur në Off-Road plot 50 km në dy drejtimet. Pasi kalojnë kontrollin e mërzitshëm policor në Strezimir, ata përshëndeten me Radikën për të marrë drejtimin drejt lumit Shtirovica, ku dikur shtrihej fshati i madh i Shtirovicës dhe më pas në një rrugë të thepisur dhe plot gurë për te dy stanet e Korabit, që për fouristrada të mirëmbajtura mund të shkohet deri në Karaulën e dikurshme Verore të ushtrisë.
Është plot 2200 metra lartësi mbidetare, kurse gjurmët e karaulës së dikurshme ekzistojnë akoma, poashtu edhe e kryqit të shkatërruar.
Pikërisht në këtë vend pamja të shijon si askund tjetër: përveç që sheh Bistrën diku atje larg, ke pranë një sy mali dhe katër maja të Korabit – Shkallën e Peshkut, Kabashin, Gurin e Kuq si dhe Korabin e Madh 2764m.
Si për të treguar madhështinë e vendit, mjafton të kujtojmë se ish Karaula Verore në Korab, ndodhet pikërisht mes Ujëvarës Përroi i Thellë dhe Korabit të Madh – dy vendet më madhështore ndoshta edhe në rajon.
Ky udhëtim, që u bë më i bukur falë edhe bisedës me barinjtë e stanit, të cilët kishin përgatitur një drekë madhështore në vendin magjepsës, u bë falë grupit të jashtëzakonshëm Dibra Off-Road 4×4, që promovon malet më të pazakonta./Foldrejt.com
Ps: Ky artikull është shkruar duke u bazuar te poezia e Naim Frashërit – Bagëti e Bujqësi!
