Rusia e ka caktuar degën e Fondit Botëror për Natyrën (WWF) në atë vend si një “organizatë të padëshirueshme”, që do të thotë ndalim i aktiviteteve të saj, raportojnë mediat e huaja, përcjell Fol Drejt.
Në një deklaratë, kryeprokurori i Rusisë akuzoi degën ruse të grupit se përbën një “kërcënim sigurie në sferën ekonomike”.
Prokurori pretendon se WWF udhëhoqi “fushata tendenciale” kundër industrive të energjisë, naftës dhe gazit natyror, të cilat ai tha se kishin për qëllim “pengimin e zhvillimit ekonomik të Rusisë”, raporton Reuters.
Është masa e fundit ligjore kundër lëvizjes mjedisore në Rusi që kur Greenpeace u ndalua si “e padëshirueshme” në maj.
WWF, e cila punon në Rusi që nga viti 1994, u etiketua si “agjent i huaj” në mars. Etiketa ka konotacionin e spiunimit dhe Rusia e aplikon atë gjerësisht për gazetarët, aktivistët dhe organizatat.
Ligji për organizatat e padëshiruara ka hyrë në fuqi në Rusi në vitin 2015, tre vjet pas miratimit të Ligjit për agjentët e huaj. Sipas atyre ligjeve, shumë organizata joqeveritare janë të detyruara të ndërpresin punën e tyre. /FolDrejt/
